Fa’aeaea ‘Ale ma ‘Ulu i le Peresetene o Tahiti

Tusia Lanuola Tusani Tupufia ma Fa’aliliu e Maiava ,

202 Hits

O le Aso Faraile talu ai, na fa’ae’e ai le Suafa ‘Tagaloa’ o le Afio’aga o Toamua, i le Peresetene o le Malo o Farani-Polenesia (Tahiti), o Edouard Fritch. O sauniga uma o le sao-i-matua ma le fa’afotu, sa fa’atinoina lea i le fale-talimalo o le Sheraton Samoa Aggie Grey’s Resort i Mulifanua.

Na amata le fa’amoemoe i se sauniga-lotu pu’upu’u na ta’ita’ia e le Fa’afeagaiga Tau-lagi a ‘Ale ma ‘Ulu ma Aiga ma le Afio’aga o To’amua, le Susuga a ‘Eletise Suluvale, soso’o ai ma tulaga masani o le fa’apa’iaina o le nofo-fou. 

Na ī-ā fa’atasi i la’ua Igoa-matua – o ‘Ale Vena ‘Ale ma ‘Ulu Vaomalu ‘Ulu Kini - o la’ua uma fo’i sa tau’avea muamua le tofi-faipule o le Itumalo o Faleata Sisifo i tausaga ua mavae - e  fa’apa’ia ma fa’amanuia atu ia Tagaloauatasi Edouard Fritch, ae maise le ‘Au-malaga mai Tahiti sa ‘auai uma i lea sauniga aloa’ia.

 Sa fa’atasi ai fo’i le Afioga a le Ali’i Palemia, Tuila’epa Sa’ilele Malielegaoi, o nisi o Minisita o le Kapeneta ma Minisita Lagolago, o sui o le Afio’aga o To’amua fa’apea le loaloa o le atunu’u sa ‘auai e lagolagoina lea fa’amoemoe matagofie.  I lona taliaina o lea fa’aeaea, na saunoa ai Tagaloa Edouard, e matua malamalama lelei lava i le fa’aeaea ua tu’uina atu e ‘Ale ma ‘Ulu ae maise, o le tāua ma le sao o le matai i le aganu’u a Samoa. 

 “Fa’afetai tele atu lava ia Toamua ma ona ta’ita’i ae maise le mamalu atoa ua aofaga-potopoto mai e aloa’ia ma molimauina lenei fa’aaloalo maualuga,” o le saunoaga lea a le nofof-fou. “’Ou te tatalo i Le Atua Soifua, e fesoasoani mai, e ta’ita’ina a’u nei i le tau’aveina o le Suafa Tagaloa. O le fa’amoemoe lava lea o tagata o le Pasefika, ia tutū-fa’atasi e tapu’e ma fa’amautuina le so’otaga va-va-lalata o tagata Tahiti ma tagata-nu’u Samoa uma.”  Sa fa’afetaia fo’i e Tagaloa, le Ali’i Palemia ona o ona taimi ‘umi, o tula’i ai pea e ‘au’auna mo le atunu’u, ma ia talotalo ai fo’i ma fa’ananau e fia maua le tomai ma le agava’a o Tuila’epa mo le ta’ita’iga o lona atunu’u. 

“E loloto lava le tofa a le Palemia ma ua fa’a’oaina i mea lelei tatou te a’oa’o mai ai,” o le fa’aopopo mai lea a Peresetene Tagaloa Edouard. Na fa’amalo atu Tuila’epa ia Tagaloa, ona o lona tula’i mai e avea ma matai-Samoa.

A’o le taimi na fa’amanuia ai e le Igoa-matua o ‘Ulu le nofo-fou, sa ia fa’amanatu ia Tagaloa, o lona aiga lea ua to’ai taunu’u iai. Sa fa’ailoa atu fo’i le tala-fa’asolopito o so’otaga a Tahiti ma Samoa, ae maise i le Tala Lelei a Iesu Keriso, le Lotu.  

 “Sa ulua’i taunu’u i Tahiti, ali’i- misionare o Ioane Viliamu ma Ellis Williams ma o latou fa’aigoa le lotu LMS (London Missionary Society), o le Lotu Ta’iti,” o le fetalaiga lea a le Igoa-matua o ‘Ulu.  

“Tagaloa, lea ua e toe to’ai mai i ou fanua ma ‘ele’ele, ma o le tasi lea mau-fa’ailoga o a tatou so’otaga, o le taeao lenei…o lou aiga lenei. O ou mamalu na ma fa’amanuiaga e te tiu ai, e pale i lou ulu, ma ia teu-malu pei lava fo’i o le faitau o lau Tusi Pa’ia.” 

Sa fa’aopoopo atu fo’i le Igoa-matua o ‘Ale ma fa’amanatu ia Tagaloa, o le suafa ua matu’u atu, o se tasi o suafa taua i le atunu’u ma ia fa’amanuia atu fo’i i le nofo-fou. 

O se taumafataga tele sa talimalo ai le faletalimalo i Mulifanua, ina ua mae’a lea fa’amoemoe i le taeao. O le Afioga a Tagaloa, o lo’o ta’ita’i maia se ‘au-malaga e silia i le 300 sui aloa’ia mai Farani Polenesia, e ‘auai i le tatalaina aloa’ia o le faletalimalo o le Sheraton Samoa Aggie Grey’s Hotel i Vaisigano, Apia.

© Samoa Observer 2016

Developed by Samoa Observer in Apia