O LA’U TALA FO’I

161 Hits

Teena e le Minisita o le Soifua Maloloina o tuua’iga e faasino i le leai o ni vailaau.

Teena e le Minisita o le Soifua Maloloina o tuua’iga e faasino i le leai o ni vailaau.

1. Matauina i Tala Fou le matua teena e le Minisita o le Soifua Maloloina o tuua’iga e faasino i le leai o ni vailaau e maua mai le Falema’i mo tagata gasegase o le atunuu sa autova’a atu i Motootua mo togafitiga.O le mea mata’utia la o le tete’e a le Minisita i le leai o ni vailaau-fai mai e le’i mafua mai ona o se aitalafu a le Matagaluega. 

O le itu la ua le malamalama ai-o lea faaaliga ua leai ni vailaau-o le faaaliga lava mai le Matagaluega o le Soifua Maloloina-ae le o se faamatalaga mai se tasi o le atunuu. O le faapea mai la o le Minisita na te le’i silafia lea tulaga-o le fesili-o le a le uiga o lea ituaiga o tali?

Afai o ia o le Minisita o le Soifua Maloloina-o ia foi la e tatau ona tali mai i le atunuu-ae le o se tali talafeagai lea tali!  O le a le uiga o lea faaupuga “na te le’i iloa ua leai ni vailaau i le Falema’i-ae o le Falema’i Tele o le Atunuu lea tatou te talanoa i ai ma o ia na lautogia na te vaaia?

Afai la e le’i silafia e le Minisita lea tulaga-ae o lana Matagaluega lea o loo tupu ai lea faaletonu-e faapefea la ona fai mai na te le’i iloa lea faafitauli?  O lona uiga na te le fesiligia lana Faatonu Sili ma le Aufaigaluega pe aisea ua tupu ai lea faalavelave?

O a mea na te silafia-ae o a mea na te le fia silafia? Afai la o le faiga lenei o loo alu ai le faafoeina o Matagaluega ma Faalapotopotoga a le Malo-faamata e le o le faamaumau tupe le igoa o lea mea?

Ia manatua foi-o tupe nei o loo faagaoioia ai le Malo-o tupe o le afu maligi o le atunuu ia o loo tigaina e totogi lafoga ma totogi aitalafu a le Malo! A toe tuu atu la i ai ma le faatalale ma le faatautala o Ta’ita’i o le Malo-o lona uiga-o le matua faatautala lava ma e o’o mai lava le faavavau- o sisina lava le afu o le atunuu! Faamata o iloa e nei ta’ita’i nai ‘alu’alutoto ia e feoa’i solo i le ao ma le po i luga o ala tetele e faatau atu oloa ona o le mativa ua i ai nei le atunuu?

O a la aia tatau a tagata ia fai mai e puipui e le Vaega Faa-Upufai a le faigamalo e aunoa ma le faamuamua o tagata? O le a sou taofi?

2. Matauina foi i Tala Fou o lea ua tatala aloa’ia se Ofisa Konesula o Samoa i Fukushima-Iapani-ma o aga masani lava ia a malo o le lalolagi ua mafana a latou mafutaga-ma ua matauina o lea sauniga sa auai atu i ai- le Sui Palemia muamua o Samoa-o Fonotoe Pierre Lauofo!

O le matau la i ai e peiseai o Fonotoe sa tatau ona avea ma Amapasa o Samoa i Iapani-aua o lea ua matua leai lava sona tofi i totonu o le faiga-malo o loo i ai nei-ma o ia foi o se Loia e mafai ona ia mata’ituina lelei le faatinoina o galuega uma a lea Ofisa Amapasa o Samoa!

Ia-e le faapea la o se mea lea e tau faatonu atu-ae afai o i ai nisi fuafuaga a le Malo mo Fonotoe-ia o tagata tonu ia (tulou) e tatau ona faaaoga e lo tatou Malo mo ana fuafuaga tu’utu’u mamao! O le a sou taofi? 

3. Matauina ma le fiafia i Tala Fou le lautogia o le Afioga a Tofa Li’o Foleni-e le gata ina avea ma Faipule o le Itumalo-ae o lea foi ua lautogia e avea ma Minisita Lagolago o le Matagaluega o Tina ma  Tamaita’i, Atiina A’e o Nuu ma Afioaga ma Aga Fesoota’i….!

O le fe’au maoa’e la o lenei Tala Fou-faafetai o lea faatoa iloa e le Malo-e i ai le itumalo  e igoa o Faasalelega Nu.3 -lea ua avea ai Tofa ma o latou Faipule.

O le uiga la o se faamatalaga-o le faatoa pa’i lava lea o Faasaleleaga Nu.3 i se tofi MInisita talu ona faavae mai lenei lalolagi-ae le afaina ai le talu ona Tuto’atasi Samoa i le 1962. E ui lava la ina e le o se Minisita Tofa-ae o le mea sili-o lea ua latalata i ai-aua o lea ua avea ma Minisita Lagolago!

O le a sou taofi?

4. Matauina i Tala Fou fai mai ua tuuina atu e le Pulega se aso faaopoopo e laisene ai  taavale a le atunuu-ma o lea fuafuaga e faasino i taavale a le ‘aufai-pisinisi. O lea la aso faaopoopo-o le asō -e tusa ai ma le faaaliga a le Ofisa Sili o Pulega o Feoa’iga i le Laueleele-o Leasi Vainalepa Galuvao.

E ui lava la ina tuuina atu lea faaaliga-ae sa matauina le faateleina pea o taavale e fia laisene i lea nofoaga-ma e foliga mai-o le amio lava lea a lo tatunuu o le faatali mo le taimi mulimuli-ma o lona taunuuga-o le vevesi i le taimi mulimuli e pei ona vaaia i ata na pu’e mo lea Tala Fou.

Ia afai la o lea o le a toe a’e aoga a le fanau-ua tatau loa lava ona faate’a lea faafitauli-ona sologa lelei ai lava lea o mea uma! O le a sou taofi?  

© Samoa Observer 2016

Developed by Samoa Observer in Apia