O le ti’eti’e uiga ese a Tofa

By Deidre Fanene 02 April 2016, 12:00AM

O nai vaiaso ua mavae atu o se ti’eti’e uiga ese lea mo Tofa Li’o Foleni. Muamua-sa i ai le fiafia ona ua filifilia e avea ma Sui Usufono o le Palemene-ona soso’o ai lea ma le mea suamalie o le keke-ina ua tofia o ia e avea ma Minisita Lagolago mo le Matagaluega o Tamaitai, Atiina A’e o Nuu ma Aga Fesootai. 

I sana faaaliga i le Samoa Observer, fai mai Tofa, ua matua faagae’etia o ia i lea faaaloalo. Ma ua sauni o ia e tautua, e faatino lana matafaioi tau le atiina a’e o nuu, aiga ma itumalo i Upolu ma Savaii. 

“Ou te talitonu-o le mea lava lenei ua leva ona faamamafa e le malo ma o lea o le a ‘ou taumafai ai i le mea sili ou te mafaia –e tusa ai ma le galuega ua uma ona amata mo le faaleleia o nei atiina a’e,” o lana faaaliga lea. “O le a matou galulue faatasi foi ma le Minisita e uiga i le faagasologa o nei atiina a’e fou ina ia mafai ai ona manuia tagata uma mai lenei atiina a’e.” Sa faamamafa e Tofa le taua o le matafaioi a tamaitai i le itu i tamaiti i totonu o nuu.

“E pei lava ona tatou iloa uma, o loo faatino e tamaitai se matafaioi taua tele i totonu o latou aiga, nuu ma ekalesia ma o lea ou te fia vaai ai i nisi tamaitai e sili atu i totonu o matagaluega ma nofoaga uma e faatino ai a latou galuega,” o lana faaaliga lea. 

“Ua ia i latou aia tutusa e pei o alii ma o lea e tatau ai ona tatou tulei pea tamaitai ina ia avea ma vaaiga tausili o soo se galuega i totonu o matagaluega, aiga, nuu ma ekelesia.”

Fai mai Tofa sa leai sona manatu o le a avea o ia ma se tasi o Minisita Lagolago. 

“Ua ‘ou matua lagona le loto maulalo ona o lenei tulaga talu ai-sa leai so’u mafaufau i se mea faapenei, ae faafetai i le Atua ona ua na filifilia o a’u e avea ma fofoga o tagata aemaise ai lava lo’u itumalo,” o lana faaaliga lea. 

“Ou te masani foi i le mea lea ua filifia ai a’u ou te galue ai talu ai-o a’u foi o se tagata faigaluega ma ou te fiafia e galue. 

“E leai ni a’u tupe ae ona o atiina a’e tau faatoaga ma mea ua ‘ou maua i aso nei-ou te faamoemoe o le a mafai ai ona ‘ou fesoasoani i tagata ma latou atiina a’e fou.”

O le mataupu mulimuli, sa faafetaia e Tofa lona aiga, lona nuu ma le itumalo mo le latou lagolago. 

“Ou te faafetai atu fo’i  i tagata uma lava mo le latou lagolago aemaise ai lava lo’u aiga. O le a ‘ou faia le mea sili e tautua ai outou faapea foi ma le atunuu. 

By Deidre Fanene 02 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>