O LE TALA FAASOLOPITO O SAMOA MAI LE AMATAGA

By Fuimaono Na’oia Fasavalu Touli F. Tupua 02 April 2016, 12:00AM

O le manumalo o Mataafa ia Tamasese, o se taunuuga lea e faapea na mafua mai le fautuaga ma le lagolago malosi a tagata Amerika ma Peretania sa lagolagoina o ia. 

A’o faagasolo le ulua’i tausaga o le taimi e faaaunuua ai Malietoa Laupepa, sa avea Mataafa ma sui o le Tupu ua faatafea, ae o le aso 9 o Setema 1888, na tofia ai Mataafa e avea ma Tupu o Samoa i Fale’ula e Alii o Atua, Aana, Tuamasaga ma Savaii, ma faae’e atu i ai le suafa Malietoa. 

Ua faasolo ina uma le aso o Tamasese, ma ina ua mae’a tausaga o taua sa fai, na manino lelei mai ua leai se taimi mo ia, ma ua avea o ia ma tagata faale-iloga ona ua tuua na o ia ma se vaega itiiti o tagata e lagolagoina o ia. 

O le aso 11 o Setema ,1889 na toe taliu mai ai i fanua  le tafeaga a le Tupu. 

O lona taunuu mai na faafeiloa’i i se vaaiga uiga ese o le toe feiloa’i fiafia lea ma Mataafa ma le atunuu sa faamuli atu.

Ua amata loa ona talanoaina le sootaga mo i la’ua i le lumana’i. O le fesili tele-O ai o le a avea ma Tupu o Samoa? 

Na vave ona manino mai-ua vaivai le finagalo o  Malietoa ma ua faaletonu lona soifua maloloina-ua leai sona finagalo e toe noatia o ia i le faafoeina ma tiute tauave o le malo, ma o le aso 2 o Oketopa na fai ai se fono tele i Vaiala. 

E sili atu i le 2000 tagata na auai, faatasi ai ma Alii o Atua, Aana, Tuamasaga, Manono ma Savaii sa auai. 

I lea Fono uiga ese na faalauiloa faalauaitele e Malietoa lona solomuli ese ae tu’u atu ia Mataafa lea sa aloa’ia ma tofia e avea ma Tupu o Samoa i lena taimi. 

Sa fia iloa e i latou uma sa auai ona o le popole pe o le a le tulaga o le a i ai, ae o lea ua ta’oto i lago tonu le mataupu. 

I masina i luma atu sa fai ai se fono i Perelini e uiga i mataupu a Samoa ae sa le vala’aulia Samoa.

By Fuimaono Na’oia Fasavalu Touli F. Tupua 02 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>