Nofo sauni ma tapenapena mo aso o i luma
I le manatu o le Tama ia Moses Vaima, 55 tausaga le matua mai Nuu-Fou, ua tatau i o tatou tagata ona mataala ona o le tele o suiga ua oo mai i Samoa, tauala mai lea i pisinisi a Saina o lo’o aumaia ma faatu i Samoa.
“Ia matapoto ai o tatou tagata i ia tulaga, aua o le mea lea ua iai nei, ua tele ina omai ma faatu ai a latou pisinisi ma atia’e ai lava o latou aiga, ae faapefea o tatou tagata? E taua ai le sauna lelei ma tapena.
O le tama ia Moses o lo’o nonofo nei ma lona aiga, o lona tuafafine ma lana fanau, ae mo ia, e leai se aiga ma se fanau.
Ma o lo’o faigaluega i se tasi pisinisi taavale a lo latou aiga, ma e $100tala lava lana tupe o lo’o maua mai i lana galuega.
‘O lo’o faamuamua a mea fai i totonu o le tausiga o le aiga, aua e leai se aiga ma se fanau i le taimi nei.
O le popolega o le tama mo aso o i luma, ina ia pulea ai e Saina lo taou atunuu i se taimi lata mai.
“Ua tele latou pisinisi ua fai, ma o lo’u a ia popolega lea ina nei uma ane ua pule faamalosi ai loa tatou e Saina I le lumanai.
‘E oo i fanua ua omai faatau, ia iloa lelei e o tatou tagata e le taua le tupe, ae o fanua ua vevesi ai a isi aiga ona o nei tulaga, e tatu ai i o tatou tagata ona taugapa lelei i ia tulaga ma vaai lelei, aua fanau mo le lumanai.
“E moni lava e taugata le soifuaga ma tele mea e fai, ae omea e maua lava I o taou lima, ua lava ma totoe na aua le tausiga o aiga ma fanau.
“Afai o le faiga lea o le tatou atunuu i le taimi nei, e oo atu i le lumanai, ua faafaigata mo tatou aemaise fanau ma lo latou taumafai mai. A omai la nei tagata tatou te leiloa pe lelei pe leaga.
O lona manatu, ina ia iloa ma lau silafia e le mamalu o le atunuu ia tulaga uma, ao lei faatuputupu laia nisi tulaga i le lumanai, aua nai afaailoa foi, tatou te le ma iloa ai le lumanai ma o na uiga, ae e taua le ola tapena.
“E lelei a le ola sauna ma tapena, ma e taua ai foi faiga nuu, le pulega a Alii ma Faipule ia faamamaluina tulafono, mo le ola saogalemu o tagata o le nuu, aemaise le atunuu mo aso a sau.