Mana’omia e le tupulaga le fa’aaoga tatau o latou taimi

By Deidre Tautua-Fanene 02 February 2018, 12:00AM

E ao i tupulaga talavou, aemaise lava i latou e le’o toe o ini aoga le tāua o le fa’aalu aogā o latou taimi e tausi ai o latou aiga.

O le taofi lea o Tesema Fa’alili, 28 le matua o le soifua mai le afioaga o Levī, Sale’imoa.

I le la fa’atalatalanoaga ma le Fofoga o samoa sa ia mata’itū ai le faigata o le soifuaga ua i ai nei.

Sa ia taumafai e fa’ailoa i le tele o tupulaga talavou ina ia latou nofo malamalama sei vaganā ua alu tatau lo latpou taimi, o le a tele ni lesona aogā o le a latou misia.

 “Ua tele suiga ua ofi mai i totonu o Samoa ma o nisi suiga fou ua tele ina a’afia ai olaga o le au laity,” o lana saunoaga lea.

“O nei suiga ua amata ona suia ai mafaufau ma auala e mafaufau ai le to’atele o le tupulaga.

“To’atele ma anoanaoa’i tupulaga o lo’o fa’ama’uma’u taimi solo, ma feoa’i solo i le taulaga e aunoa ma se manatu e su’e se galuega e fesoasoani ai i aiga aemaise o matua.

“O nisi e le taitai kea ae pei o le itu pito sili lea ona fa’anoanoa ai le loto.”

E maua atu e le Fofoga o Samoa lea taule’ale’a ua fo’i mai i uta i lana fa’atoaga.

 O lona manatu fo’i e leai se mea e oi ai aiga i le itu taumafa pe ana fa’apea o lo’o fa’aalu tatau e le tupulaga latou taimi.

 “Ou te iloa e leai lava se aiga Samoa e leai ni fanua o lo’o galulue ai,” o le manatu lea a Faalili.

 “Ana fa’apea la o lo’o fa’aalu tatau le taimi o le tama Samoa e galue ai i le fa’atoaga nai lo le fa’ama’imau taimi solo e le gapātia aiga ma faigata.

 “O tatou laueleele o lo’o aumaia tatou taumafa e aunoa ma se tupe e fa’aaluina ai.

“O le ala fo’i lea ua tele ai fa’afitauli o lo’o tula’i mai i totonu o nu’u ona ua galo i le talavou lona tiute fai.

“Tele fa’afitauli ua fa’alogo atu ai i ai e pei o le fa’aaogaina o fuala’au fa’asaina ma le tele o sauaga e tula’i mai i le va o tupulaga talavou ae ana fa’aaoga e fai ai feau a aiga ua sili atu lena.

“Tele le taimi alu vale o le tupulaga i mea le aogā ae le fa’aaoga e atia’e ai aiga ma su’e ai ni galuega e tausi ai nai matua.”

Sa fa’aalia fo’i e Fa’alili le faigofie o le olaga pe a fa’apea e fa’amuamua e le talavou lona aiga.

 “Ua faigata le olaga ma o le leai fo’i lea o se fa’amama avega I nai matua ma aiga pe a fa’apea o le sāsāla o talavou I taimi uma I totonu o le nuu.

“Pau lava le auala ou te iloa o lo’o manaomia e nai o tatou aiga aemaise lava matua o le usitai ma faalogo ma fa’aalu aogā o tatou taimi auā se lumana’i manuia o aiga.”

By Deidre Tautua-Fanene 02 February 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>