O le taumafai lava

180 Hits

Toreka Maeavalu, 28.

Toreka Maeavalu, 28.

O le tinā i a Toreka Maeavalu e to’afa lana fanau ma le tamā o le aiga ma olo’o nonofo nei i Toamua.

I le fa’atalatalanoaga ma le Fofoga o Samoa i le aso ananafi na ia fa’ailoa ai o lo’o a’o’oga uma le fanau i le taimi lenei.

“Ia o si o’u to’alua olo’o faigaluega i se tasi o faleaiga i le taulaga ma o lo’o taumafai lava ina ia mafai ona fa’atinoina o so’o se vaega e fa’apea ona atia’e ai le aiga.

“Ia e $150 lona totogi i le vaiaso, ae o le itu moni lava ia e le taitai ona lava le fa’asoa.

“A totogi le Aso Faraile e o’o atu le Aso Lulu ia ua uma, ma o le tele lava o le faiga e fai ai, ia e fa’atau niu e taumafai e o’o atu ai ua uma.

“E pei la ua avea lea tulaga ma ala e fa’afaigata ai lava ona taumafai ai si o matou aiga i le tele o aso.

Na ia fa’ailoa i le Fofoga o Samoa o le itu taua o le taumafai lava lea e ave fanau i le aoga.

“Ia e pei o lea le fa’amoemoega tele o lo’o ua i ai le taimi lenei, ia o le una’ia lea o fanau ina ia mafai ona una’i pea tamaiti.

“O se le tulaga mata’utia olo’o ua i ai le taimi lenei.

“O se itu le lelei tele le va’ai atu e tutupu fanau ae le’o o atu i le aoga.

“Ia o le taimi lenei o lo’o ua taumafai lava i le mafai e su’e sina galuega aua lava le fesoasoani le tausiaina o le aiga.

“Aua e le tele ni a matou vaega fo’i ie mo le lotu ma fa’alavelave, ae pei o aiga lava ia ave i ai le fa’amuamua.

“Aua ua tatou molimauina uma lava le taugata o le tau o le soifuaga , ae le’o se mea e tatau ona tatou nofonofo ae tatau lava ona fai vave i ai se fuafuaga.

 “O le vaavaai mamao lava aua le lumanai  manuia o si ma aiga, o le taumafai e su’e sa’u galuega e fesoasoani tele i lo’u toalua ma e gafatia lava aua o loo iai lava ala e fai ai.

© Samoa Observer 2016

Developed by Samoa Observer in Apia