Fa’amalamalama mai le tulaga o le Zika i Samoa

163 Hits

Ripotia e Deidre Fanene

Fa’aliliu e Maiava

 

Ua fa’ao’o mai se tusi-Imeli a Dr. Salanieta Saketa – o le Foma’i Fa’apitoa mo Fa’ama’i Pipisi a le Komisi o le Pasefika, e fa’amalamalama ai i le Fa’atonu Aoao o le Matagaluega o le Soifua Maloloina i Samoa, o Leausa Dr. Take Naseri le tulaga o le fa’ama’i o le Zika.

O le fa’afitauli ua tupu, o ripoti o tala-fou a le vaega fa’asalalau a Ausetalia (ABC) lea na ta’ua ai fa’apea, ua maua i Samoa nei le fa’ama’i o le Zika, i le ogatotonu o le masina o Ianuari ua mavae atu.

Ua fa’ailoa mai e Dr. Salaineta, e leai se ripoti fa’apea na faia e le Komisi o le Pasefika e ta’ua ai le maua ai i Samoa nei o lea fa’ama’i.

“Matou te le-iloa po’o fea e o-mai ai ma nei fa’amatalaga fa’apea ae matou te talitonu, atonu po’o latou faitau-sese le fa’afanua e ave atu i vaiaso ta’itasi, e lapata’ia ai atunu’u o le Pasefika, i le sosolo a le fa’ama’i ae maise lapata’iga e avatu ai mo atunu’u uma,” o le fa’aaliga lea a Dr. Salanieta i lana i-meli.

“Pei ona silafia, e iai lava le matou fa’afanua e fa’ailoga ai lea atunu’u ma lea atunu’u o le Pasefika ua iai lea fa’ama’i ma lea fa’ama’i.

“Matou te tu’uina atu lava lea ‘au’aunaga i matagaluega o le soifua maloloina i atunu’u uma o le Pasefika mo lo latou silafia ae maise o tapenaga talafeagai e ao ona sauniuni iai.

 “O le fa’ama’i o le Zika le tasi fa’ama’i o lo’o matou su’esu’eina i le taimi nei fa’atasi ma le chikungunya ma isi.” 

Na fa’alia fo’i, e na o le fa’alua lava ona latou ripotia lea fa’ama’i ina ua fa’amaonia i le tausaga ua mavae i Samoa nei. 

 “Sa matou tu’uina atu ai fo’i ma se lapata’iga o lea fa’ama’i mo Samoa ina ua outou tu’uina atu o se ripoti i upega-tafa’iLagi i le Aso 17 o Novema e uiga i gasegase na fa’amaonia ia Oketopa o le 2015,” o lana fa’aaliga lea i le tusi.

“Ina ua maua o ia fa’amatalaga, sa fa’apea lava ona matou talosagat atu i lou ofisa mo se fa’amatalaga au’ili’ili ma se tulaga ua o’o iai lea fa’ama’i peita’i, e le’i maua mai ni fa’amatalaga. 

“Sa matou tu’uina atu ni fa’afanua i luga o Upega-tafa’iLagi i vaiaso ta’itasi ma talosagaina ai sui (o atunu’u o le Pasefika) ina ia fa’afeso’ota’i mai matou nei mo ni fa’asa’oga, o fa’amatalaga fa’aopopo ma nisi o fa’aaliga moni talu ai le anoanoa’i o fe’au-tusitusia na ‘aumai e le tou vaega i Samoa.

 “O tulaga masani lava, e fa’aleaogaina o so’o se lapata’iga pe a matou maua ni fa’amatalaga maumaututu mai atunu’u uma, ua leai nisi o a’afia mo se vaitaimi e le i lalo ifo o piriota soso’o e lua po’o le matua leai lava o se isi popolega e aliali mai. 

“O se fa’anoanoa lea, ona e matou te le’i maua ni fa’amaoniga aloa’ia e uiga i lea tulaga se’ia o’o lava i le taimi na matou maua ai lau ripoti “O le Tulaga o le Fa’ama’i o le Zika” o le Aso 25 o Ianuari, 2016.

“Matou e fa’afetaia lou finagalo malamalama ona o lea tulaga ma matou te fiafia lava e talanoaina nisi tulaga mo le aga’i i luma ia ‘alofia ai nisi tulaga fa’apea e toe alia’e mai.

© Samoa Observer 2016

Developed by Samoa Observer in Apia