‘E lē Vālea uma Vale’

214 Hits

(Tusia e Miriama Alalatoa Pomare mai Ausetalia mo Tauvaga Tusiga-Tala Pupu’u a le Samoa Observer 2015).

 

Ua faifai soo le amio a le uso o lo’u tina e igoa ia Motu, o le iloa mai lava o a’u ma valaau leotele mai ni ana tala fia malie e tusa lava po’o tumu ai nisi tagata matou te le masani. O Motu e uliuli malosi le lanu o lona lauulu ae o le taimi nei ua foliga o se teine fai ata tifaga mai Amerika e poloni le ulu mafua mai ona o le vevela o le la e masani ona fao tuitui ai ma fagogota ma isi fafine o le latou pitonuu i Tufulele. 

E oo atu loa le ma savaliga ma lo’u tina i luma o le potu faamasino lona lua i le fale fou o le ofisa o faamasinoga i Mulinuu ae o’u faalogo atu ua maona a’e le ata a le tagata ma lana valaau leotele “E! Vale, o aga ga a ai? Ua e magaku ifo lava oe o oe e auku ai le case aea?”

Ou te ea atu i luga ae ma faafesagai lelei ma foliga lapopoa o Motu lea e tu faasipa ma faalagolago i le pa o le fale pei o le loia a le matou itu lea e sauni e savali faateine autu i totonu o le potu faamasino. 

“Leai e le o a’u, aua ete soona pisa i tutuli ese tatou e le leoleo i le tatou pisa”. O si a’u faalatalata atu lea ia Motu ma o’u talotalo talosia e le o toatele ni tagata e lagona mai lana faasalalauga lea e fai ao matou faatali mo le taimi e valaau mai ai le mataupu a lo matou aiga. 

O loo ma o atu ma lo’u tina o Penina e fai maua ma sui i le faamasinoga i le va o le matou aiga ma se alii faipisinisi mai Saina lea sa lisiina fanua o le matou aiga i le lua tausaga ua te’a. O la matou finau, ua uma le taimi na lisi ai e le saina le fanua ma le faleoloa e pei ona iai i la matou konekarate sa sainia ao lei faatinoina lea tulaga. Peitai ua taumafai le Saina e finau mai o le konekarate e tolu tausaga. 

Faigofie la matou finau, ua uma le konekarate ma ua mumusu foi le matou aiga e toe faaauau ona o loo ua iai nisi fuafuaga mo le manuia lautele o le aiga. O lo’u tina le ulumatua i le fanau teine e toatolu a ona matua, o isi uso e toalua o lo’u tina e aofia ai ma Motu e lei lelei ni aoga ma ua faaleano mai lava i le aiga. 

O le galuega a lo’u tama i Aukilani i Niu Sila na alai ona matou malaga i lea atunuu ma aumau ai, ma ou aoga ai seia ou oo i le Iunivesite o Aukilani lea na maua ai lo’u faailoga faiaoga ae e iai foi ma lo’u tusipasi i mataupu faale tulafono (law certificate). 

E leai sa matou loia ae o si o’u malamalama laitiiti i le itu tau le tulafono lea e fai ai a’u ma sui o la matou itu e lelei e le alu ai foi seisi seleni. 

O lo’u igoa atoa o Monavale Selau peitai e faapu’upu’u lava e lo matou aiga o Vale ae o le faaleoina sa’o o le igoa o Mo-nah-veil, o se nofoaga i Lonetona sa aoga ai lo’u tama a’o talavou. A valaau a’u e le uso o lo’u tina o Motu, e faapea mai Vale, ae folo mai ai tua “poo a ga igoa valea faapega”.

E le’i umi na matou i totonu o le potu faamasino ae sau loa le valaau, tulai le faamasinoga. O se tamalii afakasi i la’u maitau le alii faamasino ma e le matua tele lona soifua. 

E alu lava finauga o le mataupu ae o’u faasiusiumata atu ia Motu, o loo lue faasoloatoa lona ulu ma le fofoga e le malolo. Masalo ana fai lea ma a matou loia, e le maua se taimi e saunoa mai ai le faamasino. Ou te lagona lelei atu lava i le mea sa ou tu ai le musumusu a Motu i isi tagata o lo matou aiga “iiieee, gagu so’o ae le faamakala lelei le kali o le fesili, faapea a legei vale gao ia e iloa gagu”.

Sa ou taumafai e aua le amanaia lea tulaga ma faamaea lelei pea la’u galuega ua leva ona ou galue ai aua lo matou aiga. 

O le maea o le lua itula o felafolafoa’iga na toso ai i luma le nofoa o le faamasino ma faapea mai, “Faamalo i itu e lua, ua mae’a le mataupu ua maua le iuga. Faatonuina le alii Saina faipisinisi o Joe Kin, tapena ese uma ana meatotino mai fanua o le aiga ma toe faafoi uma laueleele ma fale i le aiga sa Mula. Malamalama le faamasinoga ma ua faamaonia le tali a le itu a le aiga, ua mae’a le taimi o le konekarate. Faafetai manuia le aso”.

Oka le suamalie o le lagona o le manumalo ma le faamanuiaina. E le iloa foi ni upu e faamatala ai lo ta fiafia i lea taimi ma le faafetai i le Atua ma le tapuaiga a aiga ua i’u manuia ai le faamoemoe ma ua malo ai la matou itu. O loimata o le fiafia na ou vaaia i foliga o si o’u tina ma nai tagata matutua o si matou aiga ao fai le feiloaiga ma o matou savavali ese mai ma le potu faamasino. 

I lo’u lava manatu nao a’u, e foliga ou te le talitonu i le iuga ua iai aemaise o se taimi muamua lea ua ou tulai ai faapea i se tulaga faale tulafono e faaaoga ai si o’u iloa faatauvaa i le mataupu. E fusi mai a’u e se tasi o ou tausoga o Lei le igoa ma faamalo mai ae maona a’e loa foi ma le ata leotele a Motu “oka faiga a la’u keigeikiki o Vale, aoooo e le ma’i a siteneiti a?” o lana taufaase’e lea ma aapa mai e toso atu lo’u lima. 

Na pau la’u tala na fai atu i si o’u aunt, “Moku, kuu ia lou kaufaavalea, e le valea uma Vale”. 

© Samoa Observer 2016

Developed by Samoa Observer in Apia