Manatu o le Fa’atonu - Ua logo i tino matagi lelei…

256 Hits

Tusia - Marj Moore
Fa’aliliu e Maiava

 

Ua tatau ona pati ma po le atunu’u femalagaa’i ona o se tala-fiafia ua fa’alauiloa mai  i lenei aso, e le gata i le malo ae maise fo’i se fa’aaliga mai se tasi o kamupani tuma’oti.

Mo le ‘aufai-ta’avale ma aiga o lo’o fa’amoemoe pea i le karasini, o se tala e matua talisapaia ma le agaga fiafia, le pau maulalo ua iai nei le tau o le penisini, le tiso fa’apea le karasini.

Ua fa’ailoa mai e le Ali’i Palemia, le pau o le tau o le penisini e .13 sene, mai le $2.31 sa iai i le $2.18 i le lita, le tiso e 27.2 sene mai le $2.27 i le $2.00 i le lita fa’apea le karasini ua pa’u le 26 sene, mai le $1.98 sa iai i le $1.72 sene i le lita sa iai muamua.

E ui fo’i ua tatou masani e na o nai sene e fa’aitiitia ai le tau o ia mea, a o se tala fiafia ua fa’ate’ia ai fo’i le mamalu o le atunu’u.

Ioe, na o talotaloga lava, ae talosia ia avea lea pa’ū ma amataga o nisi suiga lelei e aofia ai le fa’apa’uina o le tau o le ‘eletise, le totogi o ta’avale ma isi ‘au’aunaga masani ua fai lava si mafamafa i lenei vaitau.

Ae talosia ia ‘aua ne’i gata ai. 

O tala mai ē atamamai i nei mea, o le pa’ū fa’afuase’i o le tau o le suau’u, e faigofie lava ona malamalama iai – ua tele le suau’u ae la’iitiiti le fa’aaoga.

Atonu e le o sasa-la’au latou i Venezuela, Nigeria, Ecuador, o Brazil, Rusia ma Malo o Arapi fa’apea vaega o Amerika ona o lenei mea, ae tatou patipatia ia lea tulaga ma avea o se fasi-manuia mo tatou – mo si nei fo’i taimi.  

Peita’i o le alamanuia lea tau-suau’u, ua lausilafia i fa’amaumauga, le fesuisuia’i ma le-tumau i le tele o taimi ma e faigata tele ona fai iai o ni fa’atatauga maumaututu.  

Pei fo’i ona va’aia pea e o’o mai i le taimi nei, va’aiga o fa’aletonu sa iai i le vaitau o le 1990’s ina ua matua afaina. I ripoti a Clifford Krauss o le Nusipepa a Niu Ioka (New York Times), na matua pau maulalo tupe maua a kamupani sa aupito tele tupe na maua i tausaga e le’i mamao atu, na afua ai ona le-toe fa’aaogaina le lua-vae-tolu o a latou masini ma fa’aitiitia vave ai tupe maua mai le ‘eliina ma gaosia o le suau’u. 

E le gata i lena, e silia i le kuata miliona tagata faigaluega i nofoaga nei e gaosi ai le suau’u, na le toe maua ni galuega ae maise le pau fa’atopetope ai o masini ma vaega uma e fa’aaoga mo le ‘eliina ma le gaosia o le suau’u.

O le mafuaga o na mea uma, ona o le si’itia maualuga o le tau o le paelo suau’u, lea na sili atu i le 60 pasene talu le masina o Iuni o le 2014.

Na toe feololo le tau i nisi o taimi o le tausaga talu ai, peita’i ua matua pa’u maulalo le tau o le paelo suau’u i lenei tausaga i le maulalo ua sili atu talu le 2004. E manatu pulega o kamupani suau’u, o le a fai si ‘umi o tausaga fa’atoa toe fo’i le tau o le suau’u i le $90 po’o le $100 tala i le paelo e tasi – le tau masani sa iai i le sefulu tausaga ua mavae, ma o se tala lelei lea mo tatou. 

E fa’amae’a atu ai, o le tala’aga lava ia o suau’u e tumau pea – o le taimi ua taugata, o le taimi fo’i ua tau-pa’u ifo.

O le isi fa’aola-totoga ua tatau ai ona fa’amanatu-aloa’ia, o le fa’amautuina mai lea o se kamupani-va’alele (e tolu ai i Samoa i le taimi nei), lea o le a amata ona felelea’i i le va o motu a’o le’i ‘afa lenei tausaga.

O le fa’asilasilaga a le Kamupani Va’alele a le Talofa o le a ‘aumaia va’alele laiti e lua mai Amerika, o se musika tatagi lelei i le fa’afofoga a le atunu’u. 

Moni e lua isi kamupani o lo’o galulue nei i le atunu’u – le Polenisia ma le Samoa Air – a ua tele tala ua fa’alogo ai i le faigata lea ona maua o ni avanoa e femalagaa’i le atunu’u i le va o Samoa e lua. E masani ona mo’omia ai le  vave faia o avanoa – pe ta’ilua pe tolu vaiaso e le’i malaga ae le taulia ai le fa’afitauli o le mamafa o pauna e fa’atagaina. 

O le mea moni, e matua mo’omia tele lava nisi malaga ma nisi va’alele mo le atunu’u femalagaa’i.

Ua tatau malamalama lelei i fita ma fa’afitauli sa feagai ma kamupani-va’alele i aso ua mavae – talu le so’ona fa’atautala ma le so’ona-fai le-mafaufau e latou sa pulea ia mea-totino i na taimi – a o se fiafiaga tele ina ua fa’alogo atu i lea tala matua manaia tele ,ae maise fo’i le mafanafana lelei o le mafaufau ina ua fa’alogo atu, o lo’o taulamua ai nisi ua agava’a, e amiotonu ma tetele-fatu e pei o le Afioga a Taua Fatu Tielu. 

O le tamali’i o tamali’i e mau-a’a i talitonuga ma aga fa’aMatua lelei e le so’ona gaoia pei fo’i ona matauina a’o fa’afoe nisi o mea-lelei i le Fa’alapotopotoga o Malosi Tau Eletise, lea fo’i na toe ‘amia le Polenisia mai le pogisa sa iai, i le malamalama manaia o le lalolagi, ona o le fa’aete a le tautai matapalapala.

Ui i ia fa’atinoga lelei, e le’i maua ai ni ona vi’iga mai ta’ita’i sa pogisa pea ma u’u le silasila i le lotoifale o le tafafa. 


© Samoa Observer 2016

Developed by Samoa Observer in Apia