Tele ‘a’afiaga o le tau
O le ‘a’afiaga ua i ai nei le gataifale e mafua mai i suiga ogaoga ua i ai nei le tau.
O lea le finagalo fa’aalia o le tamā i a Fuiono Paulo o Falealupo i le Fofoga o Samoa i le aso ananafi.
Na ia ta’ua o se tulaga mata’utia ua i ai le taimi lenei o le fa’aleagaina ai o amu.
“Ia e pei o si o matou nu’u nei e le ese mai isi afio’aga e fa’alagolago lava le sami aua le fofoga taumafa aemaise o tupe maua."
“E pei e vave lava le tulaga lea pe a mafaufau i ai, mo se tupe maua i la aso, ae pei ua o’o mai nei aso ia ua faigata lava le tulaga ua i ai nei."
“O se itu e ao lava ona silasila i ai, pe a fa’atusa atu i aso ua alu, e pei na faigofie lava le fagotaina o vaega nei e pei ona i ai kuikui, fugafuga o sea i gataifale."
“Ae o nei aso, ua tele lava le suiga ua tatou i ai, ua tauau lava ina o tatou maitauina le tele o ia suiga i le mae’a ai o afa aemaise o galulolo lea ua uma atu."
“O se itu faigata lava lea i a te a’u lava ia, ma ou te iloa o suiga ma’ale’ale nei o le tau ua tauau ina fa’aletonu ai taumafaiga ua tatou i ai nei."
“O se itu lele tele ae o tatou malamalama i nei ‘a’afiaga."
Na ia fa’ailoa o le tele fo’i o le fa’atamala o tagata o le isi tulaga lea o lo’o fai ma fa’afitauli.
“Ia tatou te tau fai molimau uma i lea tulaga pe a o tatou va’ava’ai i ai, o le tele lava o tatou e so’ona lafo’ai lava le lapisi e aunoa ma se mafaufau i le tele o le ‘a’afiaga i o tatou tagata aemaise o tagata."
“Aemaise ai lava lenei pito aua o le tele o le fale gaosi oloa o lo’o latalata mai iinei, ia e ao lava ona nofo uta i ai."
“Aua e ono tafia mai vaila’au ma fa’aleagaina ai le sami, ae a galulue fa’atasi ia e le taumate le toe lelei o amu o i o tatou gataifale."