O le aso ananafi na maua ai le fa’atalatalanoaga a le Fofoga o Samoa ma le tamā i a Galoma Eliuta, 70 le matua o le soifua o Falelauniu ma Manono.

Na ia fa’ailoa e fa’apea e tele lava suiga aemaise o le ‘ese’esega ua i ai nei aso ma aso ua alu aemaise o lana silasila i le olaga i le talafatai i le taulaga ma nu’u i tua.

“Ia e mo le silafia ai , o ituaiga fanua nei i totonu i le talafatai nei i Apia ia e aoga tele mo le fanau aoga aemaise ai le au faigaluega.

“E moni lava o lo’o i ai fanua ae le mafai ona fa’atusalia ai le tetelē o fanua o lo’o i tua o matou nu’u.

 “O lo’o feololo lava fanua, ae pei la o le taimi lenei i nei nofoaga tu taulaga o lo’o ua i ai le fanau ia o lo’o taumafai lava e toto nai fuala’au mo le aiga aemaise lona atina’eina.

“Ia o a’u e fai ma asiasi i le fanau i Manono ia ou te alu ma ou toe sau fo’i.

O le a sou silafia i  aso ua mavae ma nei aso ua i ai?

“Ia a a’u ia e le tele lava sona ‘ese’esega aua o la aso ia na tele lava vaega na fa’alagolago le soifuaga i fa’ato’aga ma mea fafaga ae tau leai ni tupe e maua.

“Ia na ave pusafa’i a nai o’u matua ma fa’atau ia ou te le’o maua lelei le tupe na maua, ae pei ona ou ta’ua muamua e pei o lea le tuaga na taumafai ai lava nai aiga i la aso. “Ia ae le’i tele ni tupe ae na tele lava fa’atoaga na tua i ai.

“Ia na ou mauaina fo’i aso la sa ta’i 60sene le pisupo 6 pauna, e taugofie le tele o oloa.

“Ae o nei aso ua maua tupe ma tele ae ua taugatā oloa...ma ua fa’asolosolo lava ina matua’i taugata lava. Na ia ta’ua o le taimi lenei o mea fa’alenu’u i totonu o le afio’aga o lo’o sologa lelei lava.

“Ia e le tele lava ni vaega e fa’atino mo le nu’u ma ekalesia, o lo’o sologa lelei le tele o vaega.

“Aua e leai se mea o le a fa’asala ai fua pe afai e leai se  vaega e ono sala ai fua.