E manuia pe ā tinoū

Tusia Vatapuia Maiava ma Ilia L Likou ,

140 Hits

Ala’ia o Fagaloa.

Ala’ia o Fagaloa.

Na fofoa mai le taleni o le vaneina o meatualima mai la’au e le tamā i a Iese Ala’ia o Fagaloa i totonu o lona aiga.

I le fa’atalatalanoaga ma le Fofoga o Samoa i le aso ananafi, na ia fa’ailoa ai ua silia nei ma le sefulu tausaga o ona fa’atinoina lea galuega o le taina lea o meataulima i so’o se faiga ma fa’atau atu i le atunu’u mo se tupe  fa’asili aemaise o le aiga.

“Ia e mo le silafia ai , e pei o la’u ia va’ai  i le taimi lenei e tele atu a’u tupe e maua mai le fa’atinoina o le taina o vaega nei nai lo le to’atele  o lo’o faigaluega lelei i totonu o le atunu’u.

“Ia tasi lenei  alagatupe tele o lo’o mafai ona maua e le aiga aemaise o le  fesoasoani tele ai lea mo le tausiaina o le aiga.

“E pei o la’u ia lea mau na ta’ua muamua atu ia e tele atu tupe e maua e le tagata e na te fa’agaoiina vaega nei po’o le vaneina o so’o se ata e fa’aaoga ai la’au.

Na ia ta’ua o le taimi lenei, e silia ma le $1,000 le tupe e mafai ona ia mauaina i le vaiaso pe a fa’apea lava e lelei fa’atau o le vaiaso.

“O le uiga o la’u ia tala a sau lava le tagata e mana’o i le tanoa lava i le taimi lenei, ia ua mautinoa le maua o la’u $300 i le aso e tasi.

“A fa’aopopo le tupe e maua i  le vaiaso i lo’u iloa i ai  e tusa ma le 2,000 i le 1,500 i le vaiaso e tasi.

“E ui lava la e lelei i nisi o taimi ae i ai lava fa’afitauli.

“O  le fa’afitauli lava o lo’o i ai nei o le  fa’afaigata ona maua o le la’au aua e pei lava o le ifilele e tele ina  fa’aaogaina i le tele o taimi ona e lelei.

“O le taimi lenei e to’afa le fanau ma ua sefulu ma ona tupu tausaga talu ona ou fa’atinoina mai le tele o vaega nei.

“O lo’o ua fa’alagolago tele ai le aiga ona e leai se isi o faigaluega.

“E pei o lo’u iloa na amata mai lava i totonu o lo’u aiga, aemaise o matua ona o i latou  e fa’atinoina vaega nei.

“Ia na sau ai lava le taimi na aoga ai, ou te ta’u māmā atu lava na ou u’u tupe ae o lo’o i le aoga i le fa’atinoina o le vaneina o meataulima ma fa’atau atu.

“O lo’o ua fa’aauau mai ai lava i le taimi lenei, ia o le taimi lenei ua matua’i taugata lava le soifuaga,  ma ua faigata le soifuaga i lenei vaitau, o le tagata lava i le le tinoū o le ā pagatia ai.

© Samoa Observer 2016

Developed by Samoa Observer in Apia