E mana’omia le suavai e tagata uma – Misa

By Ilia L Likou 01 October 2017, 12:00AM

O le fa’aletonu ai o le suavai mo le afio’aga o Si’ufaga Falelatai e le’o se mea fou.

O lea le tulaga mautinoa na fa’ailoa e le pulenu’u, Misa Mealamu Misa o le afio’aga i le Fofoga o Samoa i le aso ananafi.

“Ia e mo le silafia ai, o aso lava la sa ola lava le nu’u i la matou lava ia vai, ia ua alu alu a’i lava, ua va’ava’ai atu lava i le fa’atupula’ia o nai o matou tagata."

“E pei o le ala lea na mafua ai loa talosaga ina le malo mo se fesoasoani."

Na ia fa’ailoa na o’o atu le fesoasoani ae o le fa’alavelave e le o’o i uta le suavai maua.

“Ia na taumafai lava lea la ua maua sina fa’amama avega mai nisi o fa’alapotopotoga mo le fa’ao’o ina atu o le suavai i le tele o nai aiga tu ga’uta o le afio’aga nei."

Na saunoa le tele o le aoga o le suavai.

“Ia e le tau fa’amatalatala ina lea tulaga, ua o tatou iloa ma silafia le tele o le aoga o le suavai i nai o tatou aiga, nu’u ma afio’aga."

“O lo’u iloa i ai, e lelei lava pe a leai se eletise, ae a fa’aletonu loa le suavai maua e pei o lea le itu faigata tele i lo’u iloa i ai."

“O le suavai e fa’alagolago so’o se gaioiga i totonu o aiga, ia ma so’o se mea fai lava i totonu o afio’aga ta’itasi."

“Ia ua laki si o matou pito ona o lea ua maua le fesoasoani, ia talosia ae fa’aauau pea fesoasoani nei aua le lautele o si o tatou atunu’u."

Na ia ta’ua e le tatau lava ona nofoa’i pe a o i ai ni fa’aletonu i totonu o afio’aga.

“E tatau ai lava i nai o tatou tagata ona va’ava’ai i vaega uma nei mo le lelei alu i luma o le atunu’u ona ua le toe tutusa aso."

“Ia o lea maitau atu o lo’o i ai lava nai fa’amama avega o lo’o fesoasoani tele le taimi lenei, e pei ona i ai nai malo mai atunu’u mamao."

“O se itu lelei tele lea, ma tatou tau fai talosia ai ia saga fa’atele mai pea le omai o atunu’u mai fafo e fesoasoani mo si o tatou atunu’u."

By Ilia L Likou 01 October 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>