Mata’utia ma mata’ina le po o fusu’aga

Tusia Vatapuia Maiava ma Fa’aliliu e Maiava ,

181 Hits

Harold Netzler from the Fire Department landing a big hit on La’auli Talataina of the Police Department

Harold Netzler from the Fire Department landing a big hit on La’auli Talataina of the Police Department

O fa’atautu’i, o tu’ioti, fusu’aga ma fetauiga ma le tula’i o se Ali’i Minisita i totonu o le maea ae maise le va’aia o Lupesoli’ai Joseph Parker, na matua mata’ina ai ma fiafia lea po i Tuana’imato.

O le Fusu’aga Mata’utia Lona 5 lea, o Fusu’aga Malie fa’aFiafia, lea na fa’ataunu’uina i le Faleta’alo Numera 1 i Tuana’imato. 

Moni o le fa’amoemoe ‘autu o lea afiafi o le maua o le pauna-‘ata ma sa’ili-seleni ai mo le tatou ‘Au Ta’a’alo mo le Olimepeka, ae sa iai fo’i ma nai mea mananaia sa fa’ate’ite’i ai le ‘au-maimoa sa ‘auai. 

Tu’u atu loa i le vaisu o le to’atele, lea na matu tu-vaelua ai le Kamupani a le Vailima e fa’amanaia atili ma saga fa’amatagofieina lea po.

O fusu’aga-malie a sui o isi pisinisi ma isi pisinisi, le vaega o tinei-mu ma le ofisa o leoleo, o uo e toe fetaui lava latou e aunoa ma se  popole i se isi ne’i tigaina na mata’ina i le maimoa, aua e fai lava le tagata ia i le mea e gata ai le malosi.

A o le vaega na matua fa’ate’ia ai le ‘au-maimoa, ona ua fai lava si maoa’e teisi o le mea sa fa’apea e fa’atino e Lupesoli’ai i lea afiafi – na o le ‘auai i le tufaina o fa’ailoga mo tupulaga talavou ma le filifilia o se paga aupito malie i lea po.

Peita’i, na fa’ate’ia tagata ina ua faia o se la sipaaga ma le Minisita o Feso’ota’iga ma Fa’amatalaga Tau Tekonolosi, le Afioga a ‘Afamasaga Rico Tupa’i.

 “E faigofie lava; ua va’aia le tele na’ua o tupulaga talenia a Samoa i le faipele,” o lana fa’aaliga lea i le ‘au-maimoa. 

“Pei ona talanoa ai le to’atele i aso ua mavae, o Samoa lava e tele ina avea uma pine-‘auro i aso ua tuana’i a ua fai lava si fa’aletonu i le taimi nei.” 

Sa fa’aalia fo’i le fiafia o le ali’i-siamupini ina ua va’aia le lagolago a le atunu’u ua iai i le ta’aloga o le faipele, ui e tele lava se fesoasoani o lo’o mo’omia. “O se tulaga lelei ua va’aia i ali’i-laufali fa’apea latou uma o lo’o lagolago i fusu’aga,

“E mautinoa, e toe o’o lava Samoa i le maualuga sa iai pe a tatou tu’u le avanoa i tupulaga talavou, ma ‘ave iai le lagolago latou te mo’omia aua ua matauina le to’atele o talavou talenia ua iai nei.

 “Tatou ‘ave iai le lagolago ma fa’amalosi’au iai, ma taumafai e fa’atino vaega uma latou te mo’omia e koleni ai ma atina’e le taleni.”

Ina ua mae’a si a la sipaaga pu’upu’u ma ‘Afamasaga, na saunoa ai loa le Ali’i Minisita ma ioeina le mo’omia o se lagolago aua fusu’aga i totonu o le atunu’u ma o le a fa’atinoina ai se tauvaga fa’apea i totonu o a’oga, o se la’asaga muamua mo lea fa’amoemoe lelei.

“O ananafi na amata aloa’ia ai le ta’amilosaga lea ma o se la’asaga taua tele mo le atunu’u,” o lana saunoaga lea.

“Ua silafia lelei, i le 1993, na tatou manumalo ai i pine-‘auro uma, e vagana ai le tasi, i Ta’aloga a le Pasefika i Saute; a o le taimi nei la, ua maulalo lava lo tatou tulaga ua iai. 

 “Lea ua matou taumafai e toe lalaga mai fusu’aga i totonu o polokalame a a’oga, o le tasi o ‘aua e fo’ia ai le fa’afitauli o feagai ma isi; le fa’aauau pea ona misa ma fufusu fanau i luga o le ‘auala…tatou o i totonu o le maea.” 

I le tulaga o le soifua maloloina, “Tatou taumafai e soifua malolo mo lo tatou atunu’u, ia malolosi ma soifua maloloina lelei aua o tatou aiga ma fanau.” 

O le fa’amoemoe ‘autu o lea po, na va’aia ai le mamalu o le atunu’u ua limalima-fa’atasi e lagolagoina le tatou ‘Au mo Ta’aloga o le Olimepeka i Rio, 2016, lea na maua ai le $15,000.00 mo lea fa’amoemoe.

© Samoa Observer 2016

Developed by Samoa Observer in Apia