Seāseā avea ma mea fiafia a se Palagi

Tusia Deidre Fanene ma Fa’aliliu e Maiava ,

97 Hits

O se faia’oga Matematika e 29 tausaga mai le A’oga Maualuga a Onehunga i Aukilani, o se tasi e talitonu o le a tosina mai ai ma atili mata’ina le Tauvaga o ‘Ailao Afi o le tausaga nei, lea e amata i le Aso 01 – 03 o Setema.

Aisea e ‘ese ai lea ali’i? 

O Tim Noyce, o se ali’i-papalagi ua avea le siva ‘ailao-afi, o se taleni e matua fiafia ma fa’ananau iai lona loto. 

 “E tausaga atoa o ‘ou nofo i Samoa nei a’o faia’oga i le A’oga a Vaiala Beach i le 2012 ma i le fa’ai’uga o lo’u taimi i Samoa, na amata ai ona ‘ou a’oa’o i le siva ‘ailao afi, ma o i’ina na amata mai ai,” o lana fa’aaliga lea. 

“Ina ua ‘ou toe fo’i i Niu Sila, pe atoa lava le tausaga e le’i toe faia.

Ona ma fetaui lea ma se tasi mai Vavau, sa ‘ailao afi muamua ma e fai sana ‘ausiva ma ‘ou a’oa’o ai loa i le tele o tagata ‘ese’ese ma feso’ota’i ai fo’i i isi tagata-sisiva mai isi motu o le  Pasefika. 

“Na ‘ou fa’alogo o isi se tauvaga e faia i’inei ia Setema ma ‘ou naunau ai loa e sau e tauva ai, ma ua mae’a fo’i ona ou talanoa ia Leota Lene, ma fa’ailoa iai lo’u mana’o, ‘ou te fia ‘auai.”

Na ta’ua e Noyce, o le faigata ma le lamatia ai o le soifua, o le mea tonu lava le na matua tosina ai lona mafaufau i le siva-afi.

“I le amataga, sa ‘ou mu so’o lava ma ‘ou naunau ai lava e faifai-so’o ma ia ‘aua ne’i toe mu ai,” o lana fa’aaliga lea.   

“Ae  na ‘ou te’i ina ua telefoni atu se tasi, ia ‘ou ‘aua i se fa’aaliga sa faia ma sa ‘ou manatu, ‘ou te le’i lelei tele. Ae na fa’atino lava ma na matua fiafia iai tagata, na alalaga ma fe’ei ma fa’aauau ai pea ma o lea fo’i ua fai a’u tapenaga e fa’ata’ita’i ai ma koleni. 

“Na ‘ou fa’atoa amata fa’ata’ita’i ina ua latalata i le fa’ai’uga o lou tausaga muamua i Samoa nei, pe toe tasi le masina ‘ou tu’ua Samoa.

 “E le’i matua alu iai lo’u mafaufau ae ina ua ‘ou o’o mai i le vaega lea a le Siva Afi, o ina na ‘ou a’oga fa’atasi ai ma isi tamaiti laiti, lea na atili ‘ou fiafia loa iai.”

O le fa’afiafia i luma o tagata, e malie i le silasila a Noyce aua o le uma ai o ia fa’afiafiaga, o le to’atele lava o tagata e fa’amalo atu ma fa’amalosi’au ia te ia, o tagata Samoa lava. 

Ae na fa’aalia e Noyce, e iai lava le itu malie ma fiafia ai, ae iai fo’i se lu’itau o le siva afi.

 “O le lu’itau lea, o le taumafai e fa’amatala atu le uiga i tua atu o le Pasefika, ona e le-to’atele ni tagata e sisiva i afi i le lalolagi,” o lana fa’aaliga lea. 

“A fesili mai a’u uo po’o a a’u mea e fai i le fa’ai’uga o le vaiaso, ‘ou te tali iai, ‘ou te fa’afiafia ma e fa’apea latou, ‘ai ‘ou te ta-kitara pea a. Ae fa’alogo mai o fa’apea atu, ou te ‘ailao afi, e manatu latou o se mea talapelo. 

“Ona ou taumafai lea e fa’avasega ma tau-fa’amatala. Fai mai nisi e tatau ona polesi o’u vae pe fai se mea e puipui ai lou tino, peita’i e le fa’apena tagata  o le Pasefika.

“ O le tauva ai i le ta’amilosaga lea, o le a maua ai fo’i se isi malosi fa’aopopo aua i Niu Sila, e leai ni tauvaga fa’apea, e na o le fa’afiafia lava.  

 “Ma ‘ou te mana’o fo’i e ta’u atu i tagata, e mafai fo’i e se palagi pei o a’u ona tauva i tauvaga nei ma mafai ona ‘ailao i se afi.”

© Samoa Observer 2016

Developed by Samoa Observer in Apia