O LA’U TALA FO’I

01 July 2016, 12:00AM

1.Matauina i Tala Fou se ulutala fai mai –“Ua toe mafaufau le Malo i lana fuafuaga mo se fale fogā-fale 15-o lona uiga-o se fale tele e 15 ona fogāfale. O le finagalo faaalia la o le Minisita o Pisinisi a le Malo o Lautafi Fio Purcell-fai mai atonu ua le talafeagai lea fuafuaga mo le taimi nei-ae atonu sa talafeagai i lena taimi.

O lea la fuafuaga mo se Fale Tele e 15 ona fogāfale-na aliali mai le 2012-i le taimi tonu lava o le MInisita muamua o Tupe-o Faumuina Tiatia Liuga! Afai la ua toe lotea lea mataupu i le taimi nei-o le fesili la-“o ai tonu lava lea e mana’o e fai sona ma’a faamanatu i tupe a le atunuu?

Ua lava ma totoe le telē o lea fale e ta’u mai ai ia i tatou lona tau! O le fesili la-“o mana’omia moni sea ituaiga o fale i Samoa nei-ae o le a le mea e faaaoga i ai? Afai la o tupe a le atunuu ia o loo faamoemoe e faatino ai lenei fuafuaga-poo se isi foi faaunegatupe mai fafo-ia manatua la-o nei ma’a faamanatu uma o loo naunau le faigamalo e fai-e matua leai lava se manuia o le atunuu e maua mai ai-ma o nai ma’a faamanatu uma-e le o ni mea e tumau e o’o I le faavavau-ae amulī ona pala ma nuti lili’I ae maumau ai tupe o le afu maligi o le atunuu!.

Poo le a foi le anoano o fuafuaga o to-laulau mai nei-ia manatua lelei-o le mea lea ua tatou i ai nei-“a ta’u lava-ia ona pau lena! E manaia la pe ana faapea a faatino lenei fuafuaga ona manuia loa lea o le atunuu-ae afai e leai-fai mai le upu-“fuafua mai o lea foi e fuafua atu.” E na o le fai o lea mea ma lea mea-ae leai se mea e tasi o faia-e fo’ia ai le tulaga o le mativa lea ua matua aafia ai le atunuu! Afai foi e le o iloa e le faigamalo le faiga e mafai ona lavea’ina ai le atunuu mai le taugata o le tau o le soifuaga-e na o le aveese lava o le VAGST ona uma lea! O le a sou taofi?

2. Matauina i Tala Fou se faalavelave na tupu-lea na tau’ai ai i  ma’a le taavale a le Komesina o Leoleo-le Afioga a Fuiavailili Egon Keil. Fai mai e le’i afaina le Komesina o Leoleo ma lana avetaavle-vagana ai tioata o le taavale na ta’ei.

O lea la faalavelave o loo fai pea i ai suesuega a le Ofisa o Leoleo. Ae o le o faamatalaga mai le Ofisa o Leoleo e faapea-atonu o le osofaiga a Leoleo lea na fai i Fasitoo-tai i le vaiaso talu ai mo laau faasaina-o le pogai lea na tu’ima’a ai le taavale a le Komesina o Leoleo. Afai la o le tulaga lea ua o’o i ai le atunuu-o le faatino atu o tiute o Leoleo ona e le faatagaina i le Tulafono le totoina o Laau Faasaina-ae o ane tau’ai taavale a Leoleo-o le a le uiga o lea mea? O le mea lea e igoa o le “A’aitui.”

E pule le Tulafono pe pule laau faasaina? Afai la o le tulaga lea o le a i ai Samoa-o le o atu o Leoleo e faatino o latou tiute faale-tulafono ae le malilie ai le tupulaga-o fea la o i ai Alii ma Faipule? E pulea e ni tamaiti nuu poo matai? O le a la le mea o le a o’o i ai Samoa pe afai o le a tete’e uma nuu i le faatinoina o matafaioi faale-tulafono a Leoleo? O le a sou taofi?

3. Matauina foi i Tala Fou se ulutala fai mai –“O le tatui ua popole ai- ona e i’u ina leaga ai le mafaufau! O lea la ulutala e faasino i se alii Aele lea e faapea e umi se taimi na tatui ai i se naifi. O lea la alii o loo i le falema’i-fai mai na fai lona ta’otoga ma ua i se tulaga faigata tele.

O tatui i lona ulu ua le lelei ai lona mafaufau-ma ua matua afaina ai lava lona mafaufau….!A tatou tilotilo la i nei faalavelave ma le tulaga ua tatau ona i ai le atunuu-pe a fua i le Tala Lelei-o lana faigamalo ma le anoano o tulafono-o le fesili e ono tula’i mai-“Aisea ‘ea Samoa ua e faapenei ai? Afai e na o oe le atunuu o le lalolagi atoa e faavae i le Atua-aisea ua e faapenei ai? O faapefea ona aoao fanau? E faasa e le Atua le fasioti tagata-ae fiafia tatou e fai?

O le manatu la e faapea-“Afai ua tulai mai nei mea ae sa le masani ai-o ai la e pogai ai? Pule oe ma lau talii-ae o le manatu o le Tusitala-“E mafua ona ua tatou faamuamua mea e leai se a’oga-ae faatalale i tupulaga lalovaoa e tua i ai le atunuu! A fua i le 1830 na taunuu mai le Tala Lelei ma faaliliu le Tusi Paia i le Gagana Samoa-faavae ma Ekalesia e folafolaina le Tala Lelei mai lena taimi-ae o lenei lava e fai le agasala e le fiafia i ai le Atua-o le a la le uiga o lena mea?

O le uiga-ua tatou le fia faalogo i le Atua-ae ua tatou faalogo i o tatou lava lagona-ae o le faalavelave-o ia lagona o lagona faale-tagata-ae le o se lagona mai le Atua! Afai la o le tulaga lea o le a tatou alu ai pea-ona lagona ai lea o le alofa i Matua na latou faia le Faavae o le Malo o Samoa-“E faavae Samoa i le Atua!

Afai la o le tofi lea o Samoa o le Atua-aisea ua tulai mai ai pea nei faalavelave matuiā? O aso ia sa matatau tagata Samoa i le tulafono a le Atua-“Aua e te fasioti tagata”-ae ua matua leai se mea faapena i aso nei!A loto lava le isi e fana le isi tagata-ua fana! Ua noa lava i mafaufauga o tagata! Afai la o le tupulaga lea o loo tutupu ai nei faalavelave-o le fesili taua la-“O fea o i ai matua? A ua faatalale matua-o fea le aiga ma le nuu? O le a sou taofi?

01 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>