Manatu O Le Fa’atonu - Ia manuia le 54 Tausaga o lou Malo Tuto’atasi Samoa!

By Faaliliu e Seagaitumua Tupuola 01 June 2016, 12:00AM

Ma-o lea foi ua tatou toe taunuu mai iinei. O le Asō o se taimi o sauniga faamanatu, o se taimi lea e faatali teisi ai, mafaufau ma toe manatunatu i le 54 tausaga ua mavae o Samoa-i le avea ma atunuu Tuto’atasi.

O le faatinoina la o lea tulaga, tatou te manatua ai e faapea ina ua savalia e ta’ita’i o lenei malo lenei ala i le faagasologa o tausaga e tau i le 1962, o i latou lava na muamua i lenei vaega o le lalolagi. O lona uiga-sa manaomia le avea o i latou ma alii ma tamaitai ua i ai le poto moni ma le silasila mamao-talu ai-e le toe i ai lava se mea e igoa o le toe fo’i i tua. .

Sa latou manana’o e avea i latou ma tagata muamua faatasi ai ma le tele o le lototele ma le lotomau e vaaia ai e faapea o le latou silasila mamao ua faamanuiaina.  Ma na latou taunuu lava i ai. E faapefea ona tatou iloa?

E matua faigofie lava. A toe tilotilo i tua i le tatou malaga i le avea ma malo, sa tatou iloa le le lava o alamanuia ma leai o se tekonolosi latou te faaaogaina, le tulaga lelei, le silasila mamao ma le maoa’e o le poto e mafai ona tatou aoaoina mai le ulua’i Faavae ua ta’u mai ai ia i tatou e faapea o tatou matua sa sili atu lo latou iloa i lo le latou taimi.

Ua matou fai atu faapenei ona o lo matou iloa e faapea o lo tatou Faavae o loo taoto ai le poto ma faalepo a o tatou matua uma ae le faapito mo lo latou lava taimi ae mo tupulaga a Samoa o loo lalovaoa-e aofia ai i tatou uma lava.

Ma a’o tatou tauivi ma le anoano o lu’itau ia o loo pulato’a mai i o matou mata, ma lu’i i matou ina matou tulai atu ma ni tali ia e aoga ma talafeagai lelei, e le mafai ona matou fulitua i ai ae ofo i le uiga ese o le tomai ma le poto sa i o tatou matua. O se poto lea ma tomai ua faatagaina ai tatou e savalia le ala o lo tatou faamanatuina i le avea ma malo i le asō. 

Ana aunoa ma se poto poo le tomai, atonu e le afaina pe a matou fai atu e le mafai ona tatou ‘ausia le tulaga ua tatou i ai nei. O le a leai ni sauniga faamanatu ae o le a tatou feagai ma faiga solitulafono ma le fiapulea toatasi o se tulaga e pulea ai tatou uma.

Ae faauta, e le o le tulaga lena na o’o i ai. I lenei Aso, i le avea ma tagatanuu e tausi i le tulafono o lenei atunuu”e faavae i le Atua”-o lea ua tatou faamanatuina lo tatou sa’olotoga ma lo tatou faaaloalo i le tulafono na fai e lo tatou Palemenei mo i tatou uma e ta’ita’ina ai.

O se tulaga lea e taua tele aua o lea ua tatou faamanatuina ma le fiafia, e tatau ia i tatou uma ona matua faaeteete pe a pa’ia le mataupu tau le Faavae. E tusa ai ma le malelega a lo tatou Ao o le Malo, Lana Afioga Tui Atua Tupua Tamasese Efi, e tatau ona tatou faaeteete “ina nei o tatou soli faatautala ia faalepo.”

E matua leai lava se tulaga masalomia i o tatou mafaufau e faapea e ui lava ina o lo tatou matua i le avea ma setete e matua tuto’atasi tau upufai-ae fai lava sina talavou, ua tatou iloa e mamao le ala na tatou uia i le avea ma malo ma le tele o mea ua sui.

Silasila i le nofoaga o loo potopoto ai le malo i lenei taeao e faamanatu lenei sauniga e tasi e masani ona avea ma sauniga uiga ese mo le silasila i o tatou laufanua? Ma- silasila i le faiga ua sui ai sauniga faamanatu i le tele o tausaga ma o le asō ua aliali mai ai o loo misia i le pati nisi o vaega taua o le paluga e mafai ai ona manatua pea i aso ua mavae? 

Masalo ua tatou amataina se tofi faasolo fou lea ua lagona e taitai o aso nei e faapea o faiga masani o tausaga ua mavae ua le o toe i ai se taua? Ae i lenei lava aso, e lelei ona faamanatu ia i tatou mea e sili ona taua. Ao tatou faamanatuina,  e lelei ona tatou faafetaia o tatou matua ma le ala na latou tapenaina mo Samoa e ala i o latou toto, loimata ma le afu liligi. E le tatau ona ‘asa le tatou vaaia ia latou tauiviga.

O le ta’ua la o tauiviga, e lelei ona faamanatu ia i tatou le maota muamua o le Sa’olotoga  i Mulinu’u lea na tala i lalo i ni nai tausaga ua mavae faatasi ai ma le folafolaga o se ma’a faamanatu lea lava tatou te le’i vaaia. O lena maota lea na sisi ai le Tagavai muamua i le 1962 e faamanatu ai le tala o le malaga a Samoa i le tuto’atasi. Ma o lea ua lafoa’ina i aso nei-faatasi ai ma le Malae o le Faautuga-tagi a Samoa- mo se male hockey i Tuana’imato. Matou te tatalo ua na o se fuafuaga lenei mo se vaitaimi.

I lenei Aso-e lelei ona tatou faamanatuina mea ua ‘ausia o le 54 tausaga talu ai ma manatu taumfaiga uma ma taulaga osi na fai ina ia mautinoa ai le nofo fealofania ma faiga-malo lelei i totonu o lo tatou malo. 

O le ta’ua la o faiga-malo lelei, e lelei ona tatou folafola atu o le a tatou faia mea uma tatou te mafaia-e aofia ai ma taitai o le malo-ina ia aveese le faateleina o faiga pi’opi’o lea ua faoa ai mea mai tagata matitiva o lo latou sea e tatau ai, taofia o le atiina a’e moni ma filemu mai le ‘ausia i totonu o lenei atunuu. 

O le a matou ta’ua le anoano o lipoti a le malo na totogi e le malo o loo faaaliga iinei ma ‘o.

E aunoa ma le manaomia o auiliiliga, ma matou iloa o nei lipoti o loo faaalia ai tala o taupulepulega leaga ma faiga fau faasese, fesiligia o le faaaogaina o tupe a le malo, le faatautala uiga ese o tagata faigaluega o le malo na tuuina atu i ai le vaaia o alamanuia a le malo-ae o lea lava e gῡgῡ le Palewmene ma le malo e uiga ii a mea.

Sa matou faailoa atu muamua lenei mea ae o le a matou toe fai atu foi : afai e le faaaloalogia e le Palemene ma le Malo ma vaaia o loo tausi i le tulafono na o latou faia, aisea la e tatau ai ona popole i ai tagata uma?

E tusa ai la ma lena faaupuga, matou te fia momoi atu le faamalo i le Ao o le Malo, Lana Afioga Tui Atua, Paleima o Tuilaepa Sa’ilele Malielegaoi, le malo, le itu agai ma tagata Samoa uma lava mo lenei ma’a faamanatu ua tatou faamanatuina i le asō. Ia Manuia le 54th Tausaga o le Malo Tutoatasi o Samoa, ma ia faamanuia atu le Atua!

By Faaliliu e Seagaitumua Tupuola 01 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>