Ola Toe-Fuata’ina

224 Hits

Toe mafaufau tasi lava…I le amataga o le olaga, na ‘ou iloa ai, e le maua i taimi uma mea ‘ou te mana’o iai.  Ae o aga lava ia o le ola nei, e iai lava nai fa’aletonu ma mea le-lelei e tutupu i o tatou soifuaga i aso ta’itasi.

Ae a tatou taumafai e fa’aaoga lelei fa’aletonu ia ma mea tiga e tutupu so’o, e mafai lava ona avea ma a’oa’oga lelei e fa’amalosia atili ai o tatou tagata, e atili popoto ai ma lava tapena ai mo se manuia au-i-luma. O nisi nei o ‘auala e fesoasoani e toe fuata’ina ai ma toe fa’afouina ‘Oe mai ‘ou fa’aletonu sa iai muamua.  

Muamua, ia tumau lou malosi fa’aletino. To’aga e savali pe tamo’e fo’i mo se 30 minute. Alu e a’au, pe ti’eti’e uila, si’isi’i, pe ta’alo i so’o se ta’aloga e te lelei ma fiafia iai. 

Lona lua, fai sau malologa pe a ua iai se mea ua tupu ia ‘Oe. A “ua pa ai lou tevaka”, taumafai e fa’ato’ato’a lelei lou loto; ma taumai e fai se isi mea e te fiafia iai, pei o le ta o se pese ma se musika malie, pe alu e fa’atau, alo le paopao i le sami, va’ai se ta’aloga e ta’alo ai, po’o le alu fo’i o sau tafaoga pu’upu’u i se isi mea.

Lona tolu, taumafai e ‘ata’ata. O le ‘ata e mata’a ai “vai-lololo o lou tino” o fuala’au ia o lou tino e fa’ate’a ai le tiga. Alu e ‘ata i nisi e maua ai mea-malie ma fiafia ai. E mautinoa lava sa fa’apena fo’i au uo, ma e mafai fo’i ona latou fa’ala’ei’Au atu ma fa’amalosi ia ‘Oe. E malo lava le ‘ata’ata ma fiafia fa’atasi ma isi ma talie fo’i i au mea-sese sa fai. Taumafai e fa’amalie le olaga ma mea e tutupu ae ‘aua le fa’amamafa tele ia ‘Oe.   

Lona fa, fai se mea fou. Fai mai se tasi faufautu fa’aporofesa: “O fa’alogona, o le malosi’aga ma e tatau ona fa’aaoga le malosi’aga lea, lona uiga, fa’aaoga lou malosi e fa’atino ai se galuega.” Usu se pese pe ta se kitara, toto se togala’au, fai ni mea-taulima pe tusi ni ata po’o taumafai e fa’atino so’o se mea fou, e maua ai se mafaufauga fou, se va’aiga fou ma maua ai lou malosi’aga e ola ai. 

Lona lima, fesoasoani i isi tagata. O le tulafono e le mafai ona sese o le olaga nei, e tele atu lou fiafia e maua pe a e fiafia e fa’afiafia isi tagata. “Afai e te afifi ma fa’apumo’omo’o lou olaga, e i’u ai lava ina avea ‘Oe o se tama’i-afifi.” Avea ‘Oe o se vaega e tele atu i lou tagata. Po’o a lava pefea e lu’itauina ‘Oe ma “vaivai” ai ou lagona, e mautinoa lava, e iai se tasi e “vaivai” tele atu na te mo’omia lau fesoasoani ma lau tu’u-alalo.

O le lona ono, ia manino ma sa’o le mafaufau. ‘Aua ne’i galo ou malosi’aga ae maise taunu’uga lelei sa e maua muamua. Tilotilo i ulua’i fa’aletonu sa iai, ua na o se sasi e tasi ae le o se fa’aletonu e tupu pea ma sa saga tupu-tupu pea. ‘Aua le avea le fa’aletonu e tasi e fa’aleagaina ai lou olaga atoa. E le fa’apea ona ua e sasi i si na mea e tasi, o le a fa’aletonu ai atoa ai lava lou soifua! 

Fitu, ia aoga mea ua tutupu, ma ‘aua le toe fa’aluaina le mea sese sa faia muamua. Lena ua sili atu lou silafia i le taimi nei, mo sou manuia.

Mulimuli lava, ia silafia lelei, o lo’o galue Le Atua i vaega fa’aletonu uma atoa ma mea le-lelei, mo lou lava manuia…PE a tu’u atoa lou ola i Ona A’ao, aua e Na o Ia lava e toe fa’alelei atoa mea sa fa’aletonu ma mea sa fa’atiga aua lou ola ina ia fiafia ma manuia i le lumana’i. Toe mafaufau tasi lava…                                        (Fa’aliliu e Maiava).

© Samoa Observer 2016

Developed by Samoa Observer in Apia