O LA’U TALA FO’I

01 June 2016, 12:00AM

1. Matauina i Tala Fou se ulutala fai mai “E le o i matou o ni tagata faatupu faalavelave”-ma o le faamatalaga lea a se alii e igoa o Mustenser Qamar-o se alii o le Lotu Mosalemi.

O lea la alii- e faapea e masani ona asiasi mai i Samoa nei-ma o lea la ua na faamalamalama mai tuuaiga sese e uiga i lana tapuaiga-e tusa ai ma le manatu o le toatele- “ia tapu le lotu mosalemi mai Samoa”!.

O le fesili la-o le a le pogai o le manatu faaalia o lea alii? Na sau i se fono a le latou tapuaiga pe ona pau lava lea o le mea na sau ai- e faamalamalama mai lana tapuaiga? O lona manatu e valelea tagata Samoa?

Afai la o le aano lea o lana malaga mai i Samoa-o lona uiga-o lea lava e taumafai e aumai le latou Lotu Mosalemi i totonu o Samoa. O le tulaga la ua aliali mai- e peiseai o le a fiapule mai tagata ese ia Samoa ma ana tapuaiga!

O le mea lea-afai ua uma ona aiaia faale-tulafono e matua na faia le Faavae o Samoa-o lona Malo Tuto’atasi e faavae i luga o “Talitonuga faa-Kerisiano” ma lana “Aganuu”-o le a la le fe’au a nei tagata i le Malo o Samoa?

O se Samoa e pulea e ni tagata ese ma ni tapuaiga ese-ae le pulea e tagata o Samoa? Faamata la e le o le pogai tonu lea ua ua matua inainā ai le Palemia- na te toe suia to’atasi le Faavae o Samoa na fai e ta’ita’i uma o Samoa?

O le a le pogai ua fia o mai ai nei lotu i totonu o Samoa? Poo le a lava le fai mai e le o latou o ni tagata faatupu vevesi-ae o le fesili-o le a la le tatou mea e fai pe a tulai mai ni vevesi ia tatou fanau lalovaoa i le lumana’i? E o mai le Palemia ma lana faigamalo e fai? Ae o se malo o le Palemia ma lana faigamalo pe o le Malo e “pulea e tagata Samoa uma”? O le a sou taofi?

2. Matauina o lea o le a faataatia le Tala o le Tupe a le Minisita fou o Tupe i totonu o le Palemene-ae fai mai- o le a le auai le Palemia i lea tauaofiaga muamua a le Palemene -ona o loo i Papua mo se fonotaga!

O le fesili la-faamata o le a se fuafuaga a le Minisita fou o Tupe-i se faiga e mafai ai ona toe faaola mai le faitau miliona ma miliona o tupe a le atunuu-lea na faamaumau i faiga pi’opi’o a le faigamalo- lea ua Minisita ai nei?

O lona uiga- afai e leai se fuafuaga a le Minisita fou o Tupe i lea tulaga-o tupe la a ai o le a toe faatumu ai ia tupe? Afai la ae le maua se tupe e toe faatumu ai ia tupe a le atunuu faatasi ai ma tupe na faaaoga sese e ala i taupulepulega leaga a tagata faigaluega o le Malo-o le a taatia ai lava faapenei-ae o lele e falepuipui tagata o le atunuu i le gaoi o le $20?

O se amiotonu lea mea? Afai e le o se mea amiotonu-a faapefea la ona fai? Ia manatua lelei-na amata mai lava nei faiga pi’opi’o a le HRPP - i le faatauina atu o Tusi Folau a Samoa-lea foi sa taulamua ai taitai o lenei lava faigamalo! O lona uiga la-o le mea lava lea o le alu ai le faiga o le Malo o Samoa? O fea o i ai o tatou sui filifilia i le Palemene?

O fea o i ai le PSA lea sa ta’imua i le Solo Tetele i le taimi o le faigamalo a Tupuola Efi-ae leai ni faiga pi’opi’o e pei o le taimi nei? O fea la e i’u i ai le Malo o Samoa na tigaina ma tafetotoi ai matua i le sailiga? O le a sou taofi? 

3. Matauina foi i Tala Fou nisi o tulaga pule i totonu o nisi ofisa ma faalapotpotoga a le malo- na toe faasalalau mo ni tusi talosaga. O nisi o ia ofisa o le Pulega o le Turisi a Samoa ma le Faalapotopotoga o Eleele.

A tu’u ane la i le Faalapotopotoga o Eleele a Samoa-ia atonu o se tasi lea o Faalapotopotoga ua leva ona tatau ona sui sona Pule pe a fua i le anoano o mea faaletonu na tutupu ai ma le anoano o tupe a le malo na alu ai- ona o faiga pi’opi’o a le Minisita-ae o lea lava e leai se suiga ua fai i ai.

O ai la a leaga ona faate’a lea- ae o ai e tiga lava ona leaga ae sa ona faate’a? E mafua ‘ea ona o le tele o nisi mea o loo latou iloa- ae le o iloa i le taimi -o le suesuega a le Pule ma Su’etusi Sili-ina ne’i faamalolo atu nei ona tautala loa lea?

O le a ‘ea le tonu sa’o o nei faiga? Afai la e le o mafai ona molia se Minisita e tusa ai ma ana mea leaga ma le pi’opi’o na fai –e amiotonu la le molia o isi tagata ona o le taumafa o ni pinati-ae le mafai ona molia pe a faitau miliona ma miliona tupe e alu ai? O le a le mea ua tupu nei i le Malo o Samoa ae fai mai o loo faavae i le Atua? E fiafia le Atua i ni mea leaga? O le a sou taofi?

4. Matauina foi i Tala Fou o lea lava o le a faamanatu le 54 Tausaga o le Malo Tuto’atasi o Samoa! O le fesili la-“o a mea o le a faamanatu ai lenei Tutoatasi-ae o lea ua 54 tausaga talu ona tuto’atasi? Afai e leai ni mea e faamanatu ai-o le fesili la-“Na pa’ῡ mai le Lagi le Malo Tuto’atasi o Samoa pe na maua i le toto masa’a  o Matua?

Afai la o le faiga lea na mafua ai ona maua le Malo Tuto’atasi o Samoa-aisea ua le mafai ai ona faamanatu o tatou matua sa finau ma tafetotoi i le sailiga o le Malo o Samoa? E mafua ‘ea ona le faamanatuina o tatou matua-ona e lei auai matua o tatou ta’ita’i?

Afai lava e lei feoti ai ni matua o isi-e le tioa la a faatautala i meatotino a le atunuu? E le tioa a naunau e tasui faavae ona e le o tusia ai ni o latou matua ma e leai se tasi o latou aiga na tafetotoi ai! Afai la o le faiga lea o le a alu ai-o le a faapefea la ona iloa e fanau o lalovaoa i latou na tafetotoi i le sailiga o le Malo Tuto’atasi o Samoa ma le tagata e le’i afu ai sona tamā?

O le a sou taofi?

01 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>