Manatu o le Fa’atonu - O le Tausiga o malo i totonu o lo tatou atunuu

Tusia Mata'afa Keni Lesa ma Faaliliu e Seagaitumua Tupuola ,

137 Hits

O se tusitusiga sa faaulu-talaina “Ua osofa’ia se alii faipisinisi mai Saina” lea na lomia faasalalau i le itulau 4 o le Samoa Observer i le Aso Faraile-ua lāgā ai ni atugaluga matuia-ia e tatau ona tatou maua se taimi e fo’ia ai.

O le tala o lea alii faipisinisi, o Kuan Hui San, o ia lea ua faasolosolo manuia i le Falemai o Tupua Tamasese Meaole-ina ua uma ona ulufia faamalosi e ni alii se to’alua lona fale ma osofaia o ia-o le mea moni-ua auina atu ai se fe’au o le popole ma le atuatuvale-e uiga i le saogalemu o tagata ia e mafai ona tatou faapea –o ni malo a lo tatou atunuu.

I sana faaaliga i le Samoa Observer, fai mai Mr. San ua faate’ia o ia i le mea na tupu ma ua avea ma ana faalepo i taimi uma. O ai a le faapea? E leai se tasi na te mana’omia se faiga.

O le atugaluga mo i tatou e faapea o nei ituaiga o faalavelave ua avea ma mea e tupu mai pea-aemaise ai lava le aafia ai o tagata asiasi mai i o tatou laufanua. I totonu o se tusi i la outou nusipepa ananafi, o lē na tusia lea tusi e suafa ia Dan-na ia lagā ia lava atugaluga.

Fai mai lana tusi: “I totonu o soo se isi lava atunuu, o solitulafono fuafuaina e faasaga i se vaega faapitoa o tagata e faavae i luga o talitonuga faale-lotu, poo le lanu o le pa’u-o le a faatatauina o se solitulafono tau le inoino.

O nei solitulafono e matua aloa’ia lava ma faasalaina i se maualuga e maoa’e. Ae ui o lea-i  Samoa nei-e matua leai lava se mea e faia i ai. “O fea o i ai le puipuiga a leoleo/suesuega i totonu o le nuu pe a tulai mai ni solitulafono matautia faapea-e pei o le talepe o le fale ma ulufale i totonu poo le fasi ma le sasa pala e le faasaga i tagata o nuu a’o tagata asiasi ma ii lenei malo?

“Aisea ua faapito ai i le nofoa i tua le saogalemu o tagata asiasi mai? Aisea ua faaitiitia ai le faaalia o se solitulafono e faasaga i se tagata e le nofo mai leoleo ma nusipepa? 

 “O Faasalaga e tatau ona matua fetaui lelei ma solitulafono o le inoino lea e faapea, mai le 8 o talepe fale ma ulufale i totonu o loo faafeagai pea ma a’u paaga tau galuega, e leai se tagata solitulafono na saisaia.”

Ia-e i ai se mataupu taua ua na faailoa mai, a ‘ea? E tusa ai ma le faagasologa o loo faagasolo ai nei mea, e le o lelei le tulaga o ia mea mo Samoa.

O le mataupu e faapea ua tele na’ua faalavelave ua mae’a ona lipotia, ma le anoano o isi faalavelave e le o lipotia, faatasi ai ma le lalolagi e le o lipoti, o osofaiga ia e faasaga i tagata mai fafo ia ua avea Samoa ma o latou aiga mo soo se mafuaga.

O le mea moni-o loo i ai foi osofaiga ua faia e faasaga i tagata o le atunuu-ae o lenei tusitusiga e faapito lava i le mea ua foliga mai o loo tuputupu pea i le faiga e matua faapopoleina ai. O le tausaga talu ai sa i ai foi se isi tusitusiga e uiga  i se tagata mai fafo lea na matua osofaiga i se tulaga matuiā i lona aiga.

I le isi faalavelave talu ai nei o se faalavelave lea e matua faigata, o se tagata a’oga mai Fiti na sau iinei e aoga, ae o lea ua matua finau nei mo lona ola i atunuu mamao. Sa matua mo’amo’a le fasiga o ia e nisi o loo tatou atunuu ma o lea na mana’omia vave ai le avatu o ia i fafo mo togafitiga faa-fomai.

O se faalavelave lea e matua faanoanoa ai.

Tamaiti a’oga, tagata faigaluega, tagata faipisinisi-e aofia ai le tele o tagata Asia-ma tagata su’esu’e mai fafo o loo nonofo i Samoa nei-o malo a lenei atunuu. Ua ia i tatou se tiute tauave e tausi ai ma vaai lelei i latou.

E peiseai ua ia i tatou se tiute tauave e vaai ai a tatou mea. Ioe, o nisi o i latou atonu e leai ni o latou faamoemoe e o mai iinei Ae peitai- o lena itu e le o tuuina atu i se tasi le aia tatau e osofa’i ai latou. 

Tuu le pule a le tulafono e faafeagai ma i latou ma ia tuu le amiotonu e faagasolo lana taualumaga.

O loo i ai foi lenei ituaiga o mafaufauga i nisi o tagata fai-oloa pe a latou vaaia e faapea o lea tagata e le o se tagata mai iinei, ona te’i lava lea ona sii tau o oloa mo i latou ma fai manaoga faavalevalea ia latou te le kea e fai i se tagata o le atunuu.

Ioe-atonu o se mea lea a le lalolagi atoa ae le avea lenei ma mea e fai ai ma mea sa’o

Ua lauiloa i tatou mo lo tatou agalelei. Tatou toe fo’i i lena. Tatou toe fo’i i faavae o le tatou faiga talimalo. E tatau ona tatou faia lena tulaga pe afai o le tatou alamanuia tau turisi, lea tatou te fiafia e faailoa atu ai e faapea tatou te faalagolago i ai, e moni o loo faagasolo i luma.

Ua uma ona fai le vaega a tagata fai fale talimalo e ala i le tuuina atu o fale , ae ua tatou iloa uma lava e faapea o le aofai atoa o le tomai tau turisi-e le o atoatoa e aunoa ma isi vaega ia o loo lauiliuina ma toe faaleleia.E le faapea a latou foliga palagi pe Asia e le otometi ai ona avea i latou ma faletupe. O le toatele o nei tagata o loo taumafai foi ia maua sina tupe e ono ai.

Ae peitai- e le o se mea lea e faapito i turisi.

Ua ia i tatou tagata faigaluega mai fafo ma tagata a’oga ma le toatele o isi lava tagata ia ua matu nonofo lava iinei i se taimi e sili atu i lo turisi.

Ia tatou savavali i se tasi o upu si’i maua so’o o le Tusi Paia-e ui ina o ni upu e seāseā ona faaaoga, Ia e fai i isi le mea e te manao latou te faia ia te oe. Afai e soifua tagata uma i nei upu, o le a matua faaititia faafitauli tatou te feagai ai-i lenei lalolagi. Ia outou maua Samoa se Aso Sa e mapu i ai, ma ia faamanuia atu le Atua!

© Samoa Observer 2016

Developed by Samoa Observer in Apia