O la’u tala fo’i

01 May 2016, 12:00AM

1. Matauina i Tala Fou le tatalaina o se galuega tele tau Fale Talimalo i Samoa nei-ma o lea galuega tele –o le Fale Talimalo lauiloa lea i Samoa nei-o Aggie Greys-e pei ona lauiloa ai i aso ua mavae!

Ae peitai-o lea ua matua sui atoa ona foliga-ina ua avea ma fale talimalo aupito i tele i Samoa nei-ma ua faaigoaina i le taimi nei-o le “Sheraton Samoa Aggie Grey’s. O lona uiga-ua le gata ina sui ona foliga-lona igoa ma lona tele-ae ua sui foi ma lona tulaga-pe a faatusatusa i Fale Talimalo tetele i fafo ma le salafa o le Pasefika!

A tatou toe tilotilo la i tua-o se fale talimalo na putiputi mai lona laititi se’ia o’o ina avea ma tagata matua-e le Tama’ita’i Lauiloa o Samoa o Aggie Grey. Mo i latou la e le’i silasila i lenei tamaitai-o le upu moni-e mafai ona outou faapea mai-o lea tamaitai o le Papalagi-e tusa ai ma ona foliga!

Ae afai e mafai ona outou silasila i lona loto-o le matua loto lava o le tagata Samoa e alofa i lona atunuu-ona tagata ma ona aiga. O soo se tagata lava-soo se faalapotopotoga e o’o lava i le Iuni Lakapi a Samoa-e fesoasoani lava i ai le fale talimalo o lea tamaitai!

O le tino mai la o lenei galuega tele-o le mea moni-o le taui faaaliali lea o le alofa ma le agalelei o lea tamaitai-ia Samoa ma ona tagata! Ma-e tatau foi ona momoli atu ai le faamalo ma le faafetai tele ia Laauli ma Marina Grey –ona o le finau ma le tautiga mo mea lelei e ta’uleleia ai Samoa atoa i le lalolagi! Ia faafualoa foi e le Atua lou soifua Aggie! O le a sou taofi?

2. Matauina i Tala Fou o lea foi ua toe taulimaina e le Malo o Samoa se foa’i tupe e US$1.9 miliona lea a faaliliu i Tupe Samoa-e $4.3miliona-ananafi mai le Malo o Iapani.

O le sainiga la o lea feagaiga na faatino e le Palemia o Tuilaepa Sailelei Malielegaoi ma le Amapasa o Iapani i Samoa nei-o Tuimaugaoalii Kazumasa Shibuta. Fai mai Tala Fou o se vaega lenei o le lagolago faifai pea ua leva ona tuuina mai e le Malo o Iapani ia Samoa.

E tusa ai la ma le pepa o faamatalaga na tuuina mai- fai mai o lea tupe faa-meaalofa o le a faaaogaina lelei –ae faapitoa lava mo le faatauina o oloa ma auaunaga e manaomia mo le faatinoina o atiina a’e tau le tamaoaiga ma auaunaga i nisi vaega o le atunuu.

Fai mai-o loo tilotilo le Malo i le faaaogaina o mea faigaluega e gaosia i Iapani faatasi ai ma le faaaogaina o lea foa’i mo le faaleleia o auauanaga mo tagata o Samoa. O vaega la o le Malo e ono maua se fesoasoani mai lea foa’i o le Soifua Maloloina ma le Vaega Tinei-Mu.

O le molimau la a le Amapasa o Iapani- e anoano talosaga a le malo o Samoa na tuuina atu –ae o vaega ia e lua o loo mana’omia tele ai lea fesoasoani. Fai o mea faigaluega fa’inifo ma ni taavale fui-mu o loo pito i luga o lea lisi.

Ia o se tala umi lea tala-ae o le fesili-faamata e talosagaina e le Malo o Samoa ia fesoasoani faapea pe ana leai ni faiga pi’opi’o a le faiga-malo lea e faitau miliona ma miliona tupe a le atunuu na maumau ai?

O lea foi la ua iloa iinei le pogai e mafua ai ona leaga auaunaga a le Falema’i-ona o le leai o ni tupe mo ia auaunaga-aemaise ai le le lava o ni foma’ -o le Falema’i Tele i Motootua-o le Falema’i autu lea e sulufa’i i ai le atunuu!

Afai la o lea- e tatau ona lua afe pasene le lelei o auaunaga a le Falema’i i ona vaega uma! O le a sou taofi? 

3. Matauina foi i Tala Fou le osofa’ia o se alii Saina faipisinisi e ni tagata se to’alua –ma o le tasi o i la’ua ia-fai ma o le pagota lea ua fai ma ana masani le sola soo i fafo mai le Falepuipui i Tafaigata!

O le fesili la-o le a se mea e tatau ma talafeagai ona fai i lea ituaiga o pagota! E faapefea ae toe sola foi i fafo i lea vaiaso-fasi nisi ma talepe o latou fale? E a pe a fai se tonu- a toe sola loa i tua lea pagota-ona faamalolo uma loa lea o le aufaigaluega a le Falepuipui-ae toe tuu i le Ofisa o Leoleo na te faatinoina lea galuega!

E mafua se manatu ona-o le itu muamua-ua fai ma vaisu o lea pagota le sola i tua i soo se taimi lava e fia sola ai i tua. Ua fai foi ma ona vaisu le fasi tagata-talepe fale ma le gaoi-ae le o mafai lava ona vaaia ai ni taumafaiga fou ua faatino e taofia ai lea faafitauli.

Ona pau lava lea o le mea o loo fai nei-e sola loa i tua faasalalau mai i le atunuu-ae nofonofo-ma se’iloga foi e toe maua e le atunuu-ona faatoa o mai foi lea avatu i Tafaigata mo sina taimi-ae matua leai lava se faiga e mafai ona faaitiitia faiga a lea pagota.

O le tulaga o loo i ai nei-e peiseai e pule lava lea pagota ma le taimi e fia sau ai i tua ona sau lava lea e le kea i se leoleo! O le a sou taofi?

01 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>