Falepuipui ni alii se to’atolu
E toatolu ni alii talavou ua falepuipui nei ona o se moliaga o le fasioti tagata pa’ivalea.
O latou nei o Mikaele Siaosi, Viliamu Ieti ma Faatoa Simani.
O lenei fa’aiuga sa faia lea e le tama’itai faamasino o le fa’amasinoga maualuga, Tafaoimalo Leilani Tuala – Warren.
O le alii o Mikaele o lana loia o Leafa Donald Kerslake, Viliamu o le tamaitai loia o Diana Roma ma le alii loia o Leiataualesa Komisi Koria sa tulai mo Faatoa.
O latou uma e toatolu o loo molia i se moliaga o le fasioti tagata paivalea ua le tusa lea ma le vaega 102 ma le 108 o le vaega o le Tulafono o Solitulafono 2013.
O nei alii sa faamaonia o latou moliaga i le mae’a ai o taualumaga o le faamasinoga i le Aso 21 Novema, 2017.
E tusa ai ma le faamatalaga o lenei mataupu e faapea i le Aso 27 Aperila, 2017, i se taimi o le po, sa iai le ua maliu ma lona toalua ma le laua fanau i lo latou fale.
Sa faalogoina e le toalua o le ua maliu se tasi o loo e’e mai i luma o le auala tele, o lea na la’ua tamomo’e atu ai loa ma se tasi o le laua fanau e vaai poo le a se mea o tupu pe le o se tasi foi o laua tama lea e faufau e’e mai.
Sa tamo’e atu le toalua o le ua maliu i tua o lana tama, ae na toe tamo’e mai le tamaititi lea ma fai i lona tina e toe foi i le fale.
Sa faapea ona sau ai ma le isi atalii a le ua maliu ma fai I lona uso laititi ma lona tina ina ia toe foi I tua o le fale.
I le taimi lea ua taunuu mai le taavale o loo omai ai i latou nei o loo molia I lenei mataupu.
O nisi o nei taulelea o loo molia sa savavali mai i le pito i luma o le taavale.
E tusa ai ma le faamatalaga a Tuala o loo iai faamaumauga e faapea o latou nei o loo molia sa latou lafoa ni upu palauvale ma upu taufaamata’u.
O lea na fufusu ai loa e o loo molia ma le fanau tama a le ua maliu, ma o le taimi lea ua tamoe mai ai le ua maliu mai tua o le latou fale ma o le se tasi o alii o loo molia Mikaele sa ia tu’iina le ua maliu ma paū le ua maliu i lalo.
Na toe tu i luga le ua maliu ma faaauau ona faia fusuaga ma e o loo moliaao le taimi lea ua toe tamomo’e i tua o le fale le toalua ma le fanau tama a le ua maliu.
E lei umi se taimi, ua toe foi le aualii lea o loo molia, na omai ai atalii e toalua a le ua maliu ma sii atu le lo laua tama i tua i le faleoo ao le taimi lea ua leiloa e le ua maliu se mea.
Sa aveiina o ia i le falemai ae peitai na maliu ai o ia i le Aso 29 Aperila, 2017.
Sa faatinoina foi se taotoga faapitoa i le ua mliu, ma o le mafuaaga o le maliu ona ua aafia le ulu ma ua sao ai le palapala i le faiai.
E tusa ai ma itu e ogaoga ai lenei mataupu sa faaalia e Tafaoimalo o lenei solitulafono sa faatinoina e se vaega.
"O se osofaiga lenei i le ua maliu i le taimi ua tuua ai e ona atalii ma lona toalua, ma o le taimi lea ua tuua toatasi ai o ia ma ua lamatia ai lona soifua,” o le saunoaga lea a Tafaoimalo.
“E tele ni sauaga sa faia i le ua maliu ona o lea e atagia mai i le tele o ona manuaga, e ese mai i le mafuaaga na oo ai le oti, e pei o le manu’a i lona itu agavale ma le taumatau, o se ta’e i lona laugutu, ua toulu ai ona oloa ma se manua i le itu tauagavale o lona fatafata.
“E ui o le tele o nei manuaga e leo le mafuaaga lea o le maliu, ae peitai o le nisi nei o manuaga sa mafua ai ona matapogia le ua maliu e mafua mai i le faaoogalima sa fai.
“Sa fuafua lelei lava e i latou o loo molia mai i lenei mataupu ona o latou na amataliaina mai lenei vevesi e ala mai i le latou lafoa lea o ni upu palauvale ma upu tau faamatau.
“Sa oese I latou o loo molia e aunoa ma se agaga alofa i le ua maliu ma latou tuua ai lona tino i le nofoaga sa tupu mai ai le faalavelave.”
Sa taliaiina e le tamaitai faamasino le talosaga a le itu a leoleo ina ia amataina mai se faasalaga faafalepuipui mai le 8 tausaga.
Mo Mikaele ua faamaonia lana solitulafono ma e falepuipui mo le fa tausaga, o Viliamu Eti e fa foi tausaga e nofosala ai i le falepuipui ao Faatoa e tolu ma le afa tausaga e nofosala ai i le toese.