O le olaga mafatia e moni lava mo Alosio Alosio.

O lo’o nofo i se tama’i faleoo e aunoa ma se eletise ma se suavai, leai se fale mautu.

Ae o lona mafatiaga tele lava o le tau sueina lea o se meaai e fafaga ai lona aiga.

O lenei tamā e toalua lana fanau mai le afioaga o Leaupuni.

Sa ia ta’ua foi i le vaega  o le Fofoga o Samoa e le moe lelei i le po ona o lona popole tele i lana fanau.

Ua fa tausaga talu ona latou nofoia lea nofoaga ma o le itu ta suavai lava o le faafitauli tele lea o loo feagai ma latou i aso uma.

“O le itu e leaga ai, e matou te nonofo ia tafatafa o le tane vai ae peitai e leai se suavai e oo mai ia matou.

“E leai se vai, ma o le faafitauli lea o lea matou te feagai ma matou.

“E matou te faalagolago i kalone vai e fai ai mea uma lava e manaomia i totonu o le aiga, e pei o le fufuluina o ipu ma matou ta’e’ele ai.

“O vai matou te faaogaina e matou te feinu ai e mai le matou tuaoi, ona e le mafai ona matou faaaogaina vai mai I kalone ona e le sefe lea mo matou ma le soifua maloloina.”

Sa ta’ua foi e Alosio o le fale foi o loo latou nonofo ai e leo tu mai i se tulaga lelei.

“O le itu lea matou te faaaogaina matou te momoe ai, o loo iai tonu lava le umuka i autafa.

“E leo iai foi se umukuka lelei ma o se tulaga faaletonu lea mo ia ma lona aiga ona o le asu uma o loo sau mai le umukuka e manava uma e le pepe laititi.

“O laupapa uma lava ia e fau ai le fale e maua mai i galuega ou te galue ai e oo foi i apa o le matou fale.

“E leo iai ni palanikeke ma ni fala lelei e fola ai le fale ma o le mafuaaga foi lea e tele ina mamai ai si au fanau.

“A tulai mai loa se faafitauli faapena ia ona matou faalatalata loa le i nai isi o’u aiga ina ia faafaigofie ai ona maua le fesoasoani e o ai i le falemai pe a oo ina tuga ma’i o le fanau.

“E matou te nonofo i luga o le mauga, ma e fai lava si malulu tele.

“E ese le faigata o le olaga.

“Ae peitai o mea uma lava ia ou te faia e ui lava i lou le tagolima, ou te galue lava ma le malosi ina ia ola maloloina ma aua nei ola falōlōsi au fanau.

“O lea foi ua matou see mai i uta mai o le nofoaga sa matyou nonofo muamua ai ona ou te manao e faaaoga le eleele lea e toto ai fa’i ma talo.

“E leai ni tapoleni e punipuni ai le fale, ma ua matou see mai i uta nei ona e latalata i le auala.

“Ae o le ituaiga falea lea sa matou iai e tai tutusa lava ma le fale lea ua matou nonofo ai i le taimi nei.

“A oo i le po, e ese le faigata ona e pogisa atoa le matou fale, ma o le mafatiaga tele foi lea e uia e si au fanau i aso uma.

“Tele ma anoanoai ni mea o loo manaomia e si ou aiga aemaise lava i le itu tau fale ae peitai e leai se tupe e faatinoina uma ai nei mea uma.

“E leai se eletise, ma o loo matou faaaogaina moli uila i le po, ma e momomo lou loto isi au fanau ona o le olaga lea e ola ai nei.”

Sa faaalia e Alosio o le tulaga i le tau o le soifuaga ua le mafai e tagata o le atunuu ona gafatia, sei vagana ai tagata o le malo o loo latou gafatia lava.

 “O la’u ulumatua ua fa tausaga ma o le taimi nei e aoga ia, ma ou au lava e alu e faatau fai ina ia maua mai se tupe e totogi ai o lu pili aoga.

“I le vaiaso atoa, e le oo i luga o se $200 tala la’u tupe e maua, ma o le ala lea e iai lava galuega tautala e fai pe a manaomia ai la’u fesoasoani.

“Mai lena tupe, e faaaogaina lava e fai ai faatauga a tamaiti ma mea o loo manaomia i aso uma.

“Afai ae lava le faasoa ia ua maua se pauna moa e ai i lena aso aua le aiga o le afiafi ae a leai ia ua ai na o le faalifu.

“Sa ta’ua foi e Alosio o isi taimi e faalagogalo i nai aiga o loo latou tuaoi e avatu ai ni a latou meaai ae ave ai ni latou ato meamata.

Sa ia ta’ua foi le manaomia e ia o se galuega.

“A maua lava le suka ma le meafai ti ua lava ma totoe lena mo matou.

“A le taulia ni au meamata, e le mafai ona maua se meaai o le aso, o le ala lea e manaomia ai lava se galuega e fesoasoani e tausi ai si au fanau.

“Soo se galuega lava e talia ma le faafetai tusa lava poo se fai kofe ae a maua lava se meaai mo si au fanau ua lava lea mo au.

Afai e te fia fesoasoani ia Alosio faafesootai le numera 759-1637.