Mataupu tula’i mai i luma o le fa’amasinoga maualuga

Tusia Deidre Tautua-Fanene ,

61 Hits

Court House Mulinuu

Court House Mulinuu

E tolu ni mataupu tau feusuaiga o fesootaiga sa fa’ailoa mai i luma o le fa’amasinoga maualuga i le Aso Gafua o le vaiaso nei.

O nei mataupu sa valaauina i luma o lana afioga i le Fa’amasino Sili, Patu Tiavasu’e Falefatu Sapolu.

I se tasi o mataupu o loo aafia ai se taulealea mai se tasi o afioaga mai le itu i Faleata ma le Aiga i le Tai.

Sa faia le poloaiga a le faamasinoga e faasaina ai ona faalauliloa suafa o le o loo molia ma le o loo aafia i lea mataupu.

O lea taulealea e tolu ni moliaga sa ia ioeina, o lona taumafai lea e fai se faiga aiga faamalosi ma ni moliaga e lua o le talepefale.

Sa fesiligia e Patu lea taulealea pe na te manaomia se loia e tulai mo ia ae sa tali lea taulealea e leai.

O le tamaitai loia o Lucy Sio sa tulai mo le itu a leoleo.

I le faitauina o moliaga e faasaga i lea taulealea e faapea; I se tasi o nuu i le itumalo i Faleata sa taumafai ai lenei alii e fai se faiga aiga faamalosi ma se teineititi.

O le isi moliaga e faapea i le Aso 13 Fepuari, 2018 sa ulufale faasolitulafono ai lea taulealea i se fale o le o loo tagi e aunoa ma se faatagana.

I le itu moliaga e faapea i le sa ulufale faalesolitulafono ai le o loo molia i le po i le fale o le o loo tagi e aunoa ma se mafuaaga tatau.

“O lea ua faamauina e le faamasinoga lau ioe i moliaga uma o loo faasaga ia te oe,” o le saunoaga lea a Patu.

“O le a tolopoina lenei mataupu i le aso 30 Aperila 2018, mo se tolaulauga mai le ofisa o leoleo ma se tolaulauga mai le ofisa o faanofo vaavaaia.

“Ma o le a valaauina lenei mataupu i luma o le tamaitai faamasino ia Mata Keli Tuatagaloa.”

I se tasi o mataupu e 12 ni moliaga o le faiaiga tau fesootaiga o loo faasaga i se tamā.

O le o loo aafia e faapea o le afafine fai o le o loo molia.

Sa faia foi se poloaiga a le faamasinoga e faasaina ai ona faasalalauina suafa o le o loo molia ma le o loo aafia i le mataupu.

O le tamaitai ia Lucy Sio sa tulai mo le itu a leoleo ao le tamaitai loia ia Leota Tima Leavai o loo tulai mo le o loo molia.

Sa ta’ua e Leota e 12 moliaga o loo faasaga i le o loo molia ma mai nei moliaga e 12 e lima moliaga o loo ioeina e le o loo molia ao isi moliaga o loo te’ena e ia.

Sa ta’ua e Lucy ua ioeina e le o loo molia moliaga e 5 o le faiaiga tau fesootaiga ao isi moliaga o loo tetee ai ia.

 “Lau afioga e faaauau lava le mataupu lenei i moliaga o loo tetee ai le o loo molia.”

Sa faia foi le talosaga a Leota ina ia tatalaina le o loo molia i tua ae peitai sa tetee ai le itu a leoleo ona o le le saogalemu o le na aafia.

“Lau afioga i le Faamasino Sili, o le o loo aafia o le afafine fai a le o loo molia mai i lenei mataupu.

“Ma o le itu lea matou te tetee ai le talosaga ina ia tatalaina le o loo molia I tua.”

Ae peitai sa saunoa le tamaitai loia o Leota o le teineititi lea o loo aafia i le mataupu lenei o loo i lalo o le vaavaaiga a le Toomaga mo e o Puapuagatia.

“E leai la se itu e faapopoleina ai le itu a leoleo i lea tulaga ona o le teineititi o loo ua i lalo nei o le vaavaaiga a le Toomaga.

“O lea foi e maitau atu o lea ua tolopoina nei le mataupu e faia le faamasinoga ia Aukuso ma o se taimi umi lea o le a nofo vaavaaia ai le o loo molia i lenei mataupu.

“Ua tolopoina nei e le Faamasinosili lenei mataupu mo le Aso Lua o le vaiaso fou.

“O lea faamauina e le faamasinoga le ioe a le o loo molia i nisi o moliaga ma lana tetee i nisi o moliaga,” o le saunoaga lea a Patu.

“O le a tolopoina lea mataupu i le Aso Lua o le vaiaso fou mo le loia a le o loo molia ina ia tuuina mai ai lana talosaga faapea ai ma ni mafuaaga e tatau ai ona tatalaina le o loo molia i tua e faatali ai lona faamasinoga.”

Ma le mataupu mulimuli e 18 tausaga o se taulealea ua ia ioeina nu moliaga se lua o le faiaiga tau fesootaiga ma se teineititi e i lalo ifo ona tausaga ma le 16.

O lenei mataupu e faalua ona tulai mai ae eseese taimi sa tulai mai ai.

Ua tolopoina lea mataupu e lauina le iuga o lenei taulealea i le Aso 30 Aperila 2018 i luma o le faamasino ia Vaepule Vaemoa Vaai.

© Samoa Observer 2016

Developed by Samoa Observer in Apia