Tatala Aloa’ia le tusi “Lo Tatou Tofi, le Vasa”

Tusia Maiava ,

243 Hits

Fa’atonu Sili o le Samoa Observer, Savea Sano Malifa ma le Afioga i le Palemia Tuilaepa Sa’ilele Malielegaoi.

Fa’atonu Sili o le Samoa Observer, Savea Sano Malifa ma le Afioga i le Palemia Tuilaepa Sa’ilele Malielegaoi.

O le afiafi ananafi, na tatala aloa’ia ai ma fa’alauiloaina se tusi fou e uiga i le Pasefika, o tala-pupu’u na tusia e tusitala mai le Pasefika ma ua tu’ufa’atasia e le Samoa Observer. 

O lea tusi ua fa’aigoaina o “Lo Tatou Tofi, le Vasa”, e talafeauga lelei mo le faitau a so’o se auga-tupulaga, i tala-pupu’u na lautogia i le Tauvaga Tusiga-Tala-Pupu’u a le Samoa Observer i le 2015.  

Na tatala fa’atasi lea tusi ma le ulua’i polokalame fa’ale-a’oa’oga a le itulagi e faia i luga o upega-tafa’iLagi, le Pasefika Trainer. 

Sa ‘auai le Ali’i Palemia, Tuila’epa Sa’ilele Malielegaoi i lea fa’amoemoe fa’atasi ma sui o malo mai fafo, sui o le ‘aufai-pisinisi, sui o vaega fa’asalalau, o tusitala ma latou sa tu’ufa’atasia polokalame uma.

O le Hai Komesina o Niu Sila i Samoa nei, o Jackie Frizelle na laugaina le saunoaa-‘autu.    

O tusitala-Samoa o lo’o iai a latou tala i lenei tusi, e aofia ai Suisala Mele Maualaivao, “Le Isumu ma le Fe’e”; Lemalu Sina Retzlaff, “Le Pepe e le’i Fanau”; Seiuli Seti, “Se Manatu Taufa’afefe”; Leaniva Ioane, “Fua o le Moso’oi” ma Jenny Bennett, “Ma’a o le Laumei”. 

O isi tala i le tusi lea, na tusia e tusitala mai Ausetalia, Niu Sila, Amerika Samoa, le Atu Kuki, o Fiti ma Niue. 

Na fa’aalia le finagalo o se tasi o fa’amasino – le tusi-solo logologoa o Dr. Selina Tusitala Marsh mai le Iunivesete o Aukilani i Niu Sila, e uiga i tala mai Samoa e fa’apea: ‘O le Isumu ma le Fe’e’ – “o se tala e matua atoatoa le malie ma e mautinoa e faigata ona tusia…”; ‘O le Pepe e le’i Fanau’ – “o le tala fa’amomoiloto e mata’ina lona tusiga…”; ‘Se manatu Taufa’afefe’ – manaia le amataga, e le ma’oti ona fa’amatala ae manaia le fa’ai’uga…”; ‘Fua o le Moso’oi’ – manaia le ‘autu o le tala e faigata ona galo…” ma le ‘Ma’a o le Laumei’; “…o fete’ena’iga o aganu’u masani ma le talutalu-fou…”  

Na fa’aaliea e se sui o le Komiti o Tapenaga, o Marj Moore e fa’apea, o lenei fa’amoemoe ma le tauvaga tusiga-tala na amata mai ai, o le a fa’amalosia ai tusitala o le Pasefika e fa’amatala ma tusitusia tala i o latou olaga ma si’osi’omaga masani. 

 “E uiga-‘ese le ‘oa ma le malie o nei tala,” o lana fa’aaliga lea, “peita’i o le aotelega lava lea o lenei fa’amoemoe, o le so’otaga le-motusia lea a aiga ma mafutaga fai-fai-pea.” 

“E anoanoa’i taleni fa’aTusitala i totonu o le Pasefika ma o le fa’alauiloaina pea o lo latou soifuaga ma le olaga o soifua ai, o le a o’o-o’o atu ai i le lalolagi o le ‘au-faitau, i tua atu o le Vasa Pasefika.” 

“O le fa’amoemoe lea, ina ia fa’aaogaina e a’oga ma iunivesete nei tala – o nisi ua filogia ai ma talatu’u fa’apea le loloto o le aganu’u fa’aSamoa.” 

Na ta’ua e le Fa’atonu Aoao o le Samoa Observer – o le afuaga fo’i o le tauvaga tusiga-tala, o Savea Sano Malifa e fa’apea, ua nofo sauni lava le nusipepa e fa’ataunu’uina lenei tauvaga ma fa’aauau le lolomia ma fa’asalalauina atu mo le atunu’u ma le lalolagi aoao.

Na fa’aalia fo’i le agaga fa’afetai, mo kamupani uma ma tagata ta’ito’atasi sa lagolagoina le tusiga-tala i le 2015, o tusitala ae maise le Hai Komesina o Niu Sila, na aupito tele lana fesoasoani tau-tupe mo le lolomiina o lenei tusi. 

O le tau-fa’ai’ui’uga o le tausaga nei, ua fuafua iai le tauvaga tusiga-tala o le 2016. 

I Samoa nei, o le a maua le tusi “Lo Tatou Tofi, Le Vasa” i le SSAB ma le Faleoloa o Eveni i le malae-va’alele. O lo’o maua fo’i i upega-tafa’iLagi, le shopsamoa.com

© Samoa Observer 2016

Developed by Samoa Observer in Apia