E seāseā maua se avanoa e matua fa’afofoga lelei ai ma fa’afiafiaina i musika ‘ese’ese mai nisi o ali’i ma tama’ita’i talenia o le atunu’u, ae maise la, le fiafia fa’atasi ma uo ma pa’aga a’o faia o se galuega alofa  mo nisi o lo’o fia maua se fesoasoani. 

O le afiafi o le Aso Lua, na ‘au-‘au-fa’atasi ai le Afioga a To’omalatai Mac Laban ma le faletua o Ariane Stevenson – le pule o le falekalapu (Cocktails On The Rocks Bar) e tu’u-fa’atasia nisi o ali’i ma tama’ita’i talenia i le musika, e fa’afiafia mai le itula e tolu i le afiafi se’ia o’o i le tulua-o-po-ma-ao, i se sa’iliga-seleni e fesoasoani ai ia latou na afaina i le Afa o Uinisitone i Fiti. 

Sa ‘auai i lea taumafaiga, nisi o tama-sasa’o mai le Asosi Musika o le SIMAI e pei o le All Sorts, Samoa Trio, ‘Afa & Maima Laban fa’apea nisi talenia i fa’afiafiaga tau-musika, sa fesoasoani mo lea fa’amoemoe.

“Ina ua afaina Fiti i le afa, na ‘ou va’aia le tele o a’afiaga sa iai ma ‘ou toe manatua ai le taimi o le sunami i le 2009 ma mea na fa’aleagaina,” o le saunoaga lea a To’omalatai.

“Na ‘uma loa le sunami i le tausaga lena, ae fai loa le matou sa’iliga-tupe, na ‘ou vala’aulia le ‘au-musika uma ina ia matou tu’u-fa’atasi e fesoasoani i nai aiga na a’afia, ma na ‘uma loa le matou sa’iliga-tupe lena, fai le matou koneseti fa’afiafia i le ogatotonu o le malae o le a’oga i Lalomanu, e tau-suia ai o latou mafaufau mai le fa’alavelave na tupu ae avea fo’i o se fe’au fa’amafanafana mo latou.” 

O le toe to-manatu i ia taimi, na tupu ai se lagona, e faia lenei su’ega-seleni mo Fiti. 

 “Na tupu loa le afa i Fiti, ‘ou manatu loa, o le tasi lea mafuaga lelei e tatau ona fa’aaoga ia a matou taleni. E matua to’atele ma anoanoa’i tagata-Samoa e talenia, ui e le to’atele na’ua i latou e silafia, e mafai ona latou fesoasoani atu i isi tagata, e ala i a latou taleni ia,” o le fa’aaliga lea a To’omalatai.

“Na ‘ou va’ai i taumafaiga a le malo ma le to’atele o tagata sa sa’ili-seleni mo nai tagata Fiti ma lagona ai, e tatau fo’i i le ‘Au-musika ona tula’i mai  e fai so latou sao.” 

O se lesona aoga fo’i lenei mo tupulaga talavou o le atunu’u, o le a tau’avea lenei taleni i le lumana’i. 

“O se avanoa lelei tele lenei mo a tatou fanau ma tupulaga, e iloa ai le taua o le agaga fesoasoani e ‘auala atu i a latou taleni. O taumafaiga fa’apenei e toto ai fatu-lelei i o latou loto ma iloa ai, e mafai lava ona latou fesoasoani atu e ala i a latou mea-alofa mai Le Atua,” o lana saunoaga lea.

 “O musika, o siva ma isi lava taleni ‘ese’ese, e mafai ona fa’aaoga e fesoasoani atu ai, ae le fa’apea na o le sailia ai o se tupe.

“O Fiti o se vaega o le tatou Aiga i le Pasefika ma e tele fo’i ina fesoasoani mai pe a mafatia tatou, ma e tatau lava ona fa’amautuina lea so’otaga lelei ua leva.” 

Na amata le fa’amoemoe lea i le Aso Lua, i le ta’i-sefulu tala le ulufale ma na fa’ateleina le a’ao-foa’i o le mamalu o le atunu’u sa mafai ona ‘auai atu mulimuli ane.

Na toe fa’amanatu ai fo’i e To’omalatai, le taua o le fa’aaogaina lelei o taleni ua fo’aia.

 “E ‘ese le taua mo tagata e iai taleni nei, ae fa’aaoga tatau i se mea aoga. Moni o tupe e fa’amoemoe iai mo le soifua ae ina ia fesoasoani atu i isi tagata, o le taleni lena e fa’aaoga ma e tumau i lou soifuaga atoa,” o lana saunoaga lea. 

“’Ou te momoli atu ai le fa’afetai tele i le ‘Au-musika uma na fa’ama’umauina o latou taimi e lagolago ai mo lenei fa’amoemoe ae maise i latou sa tu’uina mai a latou meaalofa. Ua tatou tutu-fa’atasi mo le manuia o isi uso-a-tagata.”

O seleni uma na maua i lenei taumafaiga, o le a fa’ao’o atu i le Sosaiete o le Koluse Mumu mo le ‘auina atu i e o lo’o mafatia.