O le afiafi o le Aso Lua sa faalauiloaina ai se tasi o poloketi a le Matagaluega o le Soifua Maloloina e ala i le tete’e atu i le ulaula tapaa.

O se tasi lea o taumafaiga a le matagaluega e fa’atino i tausaga ta’itasi e unai’a ai a latou fa’alauiloa e tete’e atu ai i le ulaula tapa’a.

E pei ona i ai lana manulauti a le matagauega o le tausisi i le soifua maloloina mo le soifua manuia o tagata uma.

O le tatalaina aloai’a o lea fa’amoemoe sa saunoa ai le Minisita o le Soifua Maloloina Tuitama Dr. Talalelei Tuitama.

“O le taumafaiga a le Soifua Maloloinai i le lalolagi e fa’aitiitia le ulaula tapa i totonu o le atunu’u.

Manatua foi o lea ua uma ona i ai le matāti’a o lo’o fa’atasi ai ma isi atunuu o le lalolagi o lo’o ua au fa’atasi ma tatou ina ia mafai ona tafi esea le ulaula tapa’a mai totonu o le atunuu i le tausaga e 2025.

“O le tatou taumafaiga lea e aga’i ai lea e i ai le taumafaiga nei.

“E pei ona silafia foi ua uma ona toe iloiloina ma teuteuina le tulafono o le ulaula tapa’a ina ia fa’afaigata ai e tagata o le atunuu ona fa’aosofia ma tagofia le sikaleti ona o ona a’afiaga ogaoga o lo’o a’afia ai le atunuu.

“E le taumateina le anoanoa’i  o’i latou ua lago mai ti’asa ona o tulaga lava o a’afiaga o le tapa’a ua a’afia ai i le kanesa o le māmā, fa’apea foi ma le kanesa o isi itu tino.

“I totonu lava o Samoa o le naunautaiga foi lena ina ia mafai ona ausia lea matāti’a e fa’aitiitia ai a’afiaga o tatou ma tulaga ogaoga o lo’o a’afia ai tatou tagata.”

Sa fa’aalia fo’i e Tuitama ua maitauina le fa’aitiitia o le tagofia e tagata Samoa o le tapa’a.

“Ae ua maitauina le faaitiitia ma le amanaiaina foi o le tatou atunuu o le faaitiitia o le tagofia o le tapa’a ona ua mamalu le tulafono a le malo.

“Ua va’ava’ai tele foi le tulaga o le ulaula ua au fa’atasi ai ma afioaga i nuu i tua ma fa’amalosia foi i totonu o ekalesia fa’apea ma pulega a alii ma faipulei i nuu ma afioaga.

“O lenei feagaiga na saini i le 2003 faamalosia i le 2005.

“O lo’o tauave mai lava ma mulimuli taia e Samoa.

“O Samoa o le tasi lea o atunuu e 15 lea ua filifilia mo le taumafaiga lea ua fai nei ma e na o le pau lenei o le atunuu o le itu lagi lenei o le pasefika I Sisifo ua filifili mai ai I le polokalame nei.

“O le taua lea o le vaai mai a le soifua maloloina a le lalolagi ma faalapotopotoga tetele a le lalolagi I le fa’atauaina o Samoa ma le tulaga o loo i ai taumafaiga aemaise le soifua maloloina lea ua tu’u mai ai pea o latou tauau ma fiafia e fesoasoani mai e fa’ataunu a tatou fa’amoemoega mo se Samoa soifua maloloina mo le agai at i le lumanai.”