Mana’omia e Moli se galuega

Tusia Deidre Tautua – Fanene ,

28 Hits

Moli Vaili, o lo'o mo'omia se galuega.

Moli Vaili, o lo'o mo'omia se galuega.

E 28 tausaga o Moli Vaili mai le afioaga o Malie.

I le la fa’atalatalanoaga ma le Fofoga o Samoa na ia fa’ailoa ai le mana’omiaga o le fia maua o se galuega e tausi ai ona mātua ma lona aiga.

“E to’avalu matou ae mai lena to’avalu e leai sesi e faigaluega,” o le saunoaga lea a Vaili.

“O le vaitau lenei ua taugata tele le soifuaga ma ua atili ai ona faigata le olaga.

“O le ala lea ua ou mana’omia ai lava se galuega auā le tausiga o si o’u aiga aemaise lava o’u mātua.

“So’o se galuega lava e maua i le vaitaimi lenei e faigofie lava o lea e lava le malosi toe talavou fo’i.

“Ua tatou malamalama uma i le vaitau lenei e le’o toe i ai se mea o toe faigofie a le galue le tagata e le mafai fo’i ona atia’e lona aiga.”

Sa fa’aalia fo’i e Vaili o le taimi lenei o lana galuega i aso uma o le usu lea i le fa’atoaga.

“E o’o fo’i i le fa’atoaga e le gafatia e le tupe maua mai i le fa’atoaga ona tausi le aiga.

“Ua o’o lava i fua o fa’aeleelega ua le a’ua’u i le fofoga taumafa.

“O le tele lava o taimi e le gafatia fo’i ona fa’atau fua o fa’aeleelega ona e fai lava si to’atele o le aiga nei.

“Ae a maua sina galuega ou te iloa fo’i e le lava ae na’o sina tupe e tausi ai nai o’u matua ma le aiga

“E pei lava o o’u matua le auga o nei mea uma ina ia lelei le tausiga o laua.”

Afai e te fia fesoasoani i a Vaili faafesootai le numera o le telefoni 7278026.

© Samoa Observer 2016

Developed by Samoa Observer in Apia