Mana’omia e le tamā se galuega

By Deidre Tautua – Fanene 01 February 2018, 12:00AM

I le vaitau lenei o le soifuaga a to’atasi le tagata faigaluega e le mafai ona gafatia le tausiga o le aiga.

O le talitonuga lea a le tamā i a Tifatifa To’ana’i, 40 le matua o le soifua, mai le afioaga o Faleasi’u.

O lenei tamā e to’atolu nai ona alo e lē faigaluega ae na’o si ona to’alua e faigaluega i le latou aiga.

E ui i le lē faigaluega o lenei tamā, ae o lo’o fai lana fa’atoaga e fesoasoani ai i si ona to’alua i le tausiga o le latou aiga.

I le fa’atalatalanoaga ma le Fofoga o Samoa sa ta’ua ai e To’ana’i o latou sa latou nonofo muamua i le a’ai i le latou aiga.

Ae peita’i ua manana’o lava latou e atia’e lo latou aiga o lea na ala ai ona latou si’itia i uta.

Sa ia ta’ua fo’i le tulaga o lo’o i ai le soifuaga ma le taumafaiga o si ona aiga.

“Ina ua matou omai iinei e na o le pau ia o mea ua mafai ona maua e fausia ai se matou fale,” o lana saunoaga lea.

“E pei ua lua va’ai mai nei, e laititi lava si matou fale ma e matou te momoe fo’i i le vaega lea e kuka ai matou mea’ai ona o le laititi o le fale.

“Ua matou mana’omia lava se fesoasoani i ni apa ato fale ma ni laupapa ina ia fa’atelē ai le matou fale ina ia lava se avanoa e momoe ai si a’u fanau.

“O na o le taimi nei e fa’atau ta’itasi mai lava mea o e mana’omia o le fale pe a o’o ina maua le totogi o si matou aiga e fonofono ai le fale mo lenei taimi.”

Sa ia ta’ua fo’i o lana fesoasoani i totonu o lona aiga e auala mai lea i lana fa’atoaga.

“Pau lea o la’u galuega ou te fesoasoani ai i totonu o lo’u aiga,” o le saunoaga lea a To’ana’i.

“O a’u fuala’auaina fo’i lea e fa’atau e maua mai ai sesi alagā tupe e fesoasoani ai i si o’u to’alua.”

Sa ia faa’alia fo’i e le’i leva ona toso atu le latou vai ma le eletise.

“O le matou vai lea e ola lelei i le mae’a ai ona matou totogiina le $1200 o le aitalafu a se tasi aiga lea na ala ai ona ola mai le matou vai.

“Sa mafai ona totogiina uma nei mea e ala mai i le totogi o si matou aiga faatasi ai ma le fesoaosani mai foi o nai aiga o loo aumau i atunuu mamao.”

O le mana’omiaga tele o lenei tamā o le fia maua lea o sana galuega.

“O si ma fanau lea la’a ave i Savai’i i le aiga o lo’u to’alua e nonofo ai ma aooga.

“O ma fuafuaga uma nei ona o lea fo’i e tau saili se galuega e fesoasoani ai i le tinā o le aiga ma tausi ai si maua fanau.

“O le olaga fo’i lena I totonu o Samoa e ao ina pulupulu lima fa’atasi uma auā le tausiga o aiga aemaise le fanau.

Afai e te fia fesoasoani i a To’ana’i e ala i se galuega mo ia fa’afeso’otai le numera o le telefoni 7625528.

By Deidre Tautua – Fanene 01 February 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>