O le Ata i lo’u lima ma le fagupia i lo’u mafaufau

515 Hits

(Tala-fatu pupu’u Fa’aSamoa na ‘oto mai le Tusi RYHANAPOINCIANA SAMOA – Agafili Laau Tuitolovaa)


Ua i tulu’ipae o le maota fa’atasau o le vanimonimo lau pele; se asoga to se mala ma liusuavai ai lou fa’amoemoe; e auma le alofa ma le alofa mutimutivale? 

Talofa ia Tepora, na te le o iloa le mamafa ia te a’u o lana malaga”. O mafaufauga ia o lo’u loto ma ‘ou fa’atofa atu i le teine, a o tu ma talotalo mai lona pulou laufala ula mumu ma samasama i le faitotoa o Sina, i Faleolo.

O Sina, o le tausala Polenisia ua masani ma ala o le ea. O le tautai poto ma lagolelei e faamemelo i ai le mafaufau.

Ua liliu Tepora ma savali i totonu o le vaalele, ae tiai mai i mata o lou faiai ona uiga ma ona foliga, ou te toe mafaufau i ai.

O se teine maualuga ma tino lelei.

E faamigimigi uliuli uumi lona lauulu.

E fufua ona mata ma ona puisu lapotopoto.

O ona uiga le soona tautala, e maluia ai se tama.

E amio pule ma faaaloalo aua o le tauagafau a le tausala.

E le o se teine ata soo, ae a ata, o le matua faalavelave lava le mea, aua e mafai ai e le lima ona talanoa ma le vae.

E tafe i ai le faua, pei se taumafataga manogi ua laulauina mo taulelea.

Ua ola le vaalele ma sosolo malie atu i le itu i sisifo, a o laupae ma loimata aiga ma uo ma talotalo atu o latou lima ma solosolo.

O faamalama lapotopoto laiti i autafa o Sina, o lo o iloa atu ai ulu o le pasese, pei ni popouli.

Ua ‘ou tu ma tau falo atu lou ulu, a ua goto atu Sina i sisifo o le malae ma suniuni o le a lele.

Ai lava e faapea faailoga o le sau a le sausi pei o fagogo a loomatutua; fai mai e taalili le vao ma feemo uila.

E faapena le taalili ii alamu ane o Sina pei o le emo o le mata ma lele loa a o lo o emoemo malosi le moli faailoilo i luga o le fale.

O le la, toe o se aga ona palasi lea i le sami.

Ua fisaga foi le matagi ma ua tafe malulu ai lou toto.

E ui ina lagi lelei mo folauga i le tai ma le ea, ae lei maua ai sou fiafia aua ua tata popole lou fatu pei o lo o uu lou ola. 

E le iloa lava mea tutupu pei o taga fai i vasa. Ou te lelava faalogo atu ua mu le vaalele.

Ou te le ma e tau atu, na ou matua tatalo malosi i le Atua ia alofa ma faasao le ola o le teine. 

Ua malemo atu nei le uu o le vaalele i galu o le vateatea, ona ou foi ai lea ma le faanoanoa i lou aiga.

Na ou mafaufau i le ma tafaoga ma Tepora ananafi i le fogafaletonu o le NPF. O le taimi mulimuli o le a ma faamavae, na ou fai atu ai i le teine, “Ua lelei, sau ina alu i Niu Sila sei faaoo lou fia alu ae vaai oe, e te alu ma le mafanafana o lou alofa, ae e te foi mai ua maalili”.

Pei ua ou toe vaai atu i lana ata ma fai mai, “Kuluva, e te nofo ma manatunatuga lelei mo lenei aso, ae ou te alu ma moomooga fia mafuta pea ia te oe le uo.

“Na o le tolu masina o lau malaga ae a fai lava na o le lua vaiaso ae ou toe foi mai, o lena lava.

“O le mea ua e fai mai ai, o le a ou mafaufau pea i au fautuaga.

“E le faigofie foi ia te au, ona ou alu ae tuu oe.

“Sole, e le uma le alofa”.

Ua ou mafaufau pei ua ou toe vaai atu ia Tepora o savalivali faanoanoa agai i uta i le faleoloa o Amau e faatali ai sana pasi, a o ou tu i tafatafa o le fale o Pipi ma tulimatai si ana laalaa lemu ma lana ato lanumoana o lo o afisi limalua i lona itu tauagavale.

Po o le itula e iva i le po ina ua ou foi mai le malae vaalele na ou taunuu ai i lo matou fale, ma o le po tonu lea o le Kerisimasi.

O lumafale, o lo o pisapisao ai nai ou tei ia latou meataalo ma faapapa le fanaofe.

O lou tina, o lo o nofo faafesagai ma le leitio ma faalogologo i faamanuiaga mai Niu Sila.

Ua liliu mai le loomatua o Leilani ia te au. O ona foliga, ua ou iloa atu ai le ita aua lea faatoa ou oo i le fale, talu mai le uma o toonai i le aso Sa ananafi, a ua alu le ma tafaoga ma Tepora.

Ua ki i lalo e le loomatua le laau ae ote.

“Sole Kuluva, o fea sa e kaa ai ua uma le aso Sa e ke le loku, legei foi ua po aku ma legei aso, o lea faakoa e aliali mai.

“Kalofa se i lou olaga, ua e maua le malosi oga galo lea o le Akua..

“Ua alu le vaiaso akoa o e faigaluega ma e igupia, a o si gei foi aso e kasi, sei e alu ai i le falesa. A vaivai i le isi aso ae sei loku i se isi aso. A saga fai lava i fea lega valea?

“Va’ai oe, a augoa le kagaka ma le Akua, e maumau le ola.

“Ua uma on ou fai aku e kuu le fai uo, ae le mafai”.

Ua ou faanoanoa lava aua e le o iloa e Leilani le mea lea out e mafatia ai: faaopoopo mai ma lana faatiga, ua tauau e malo le lagona, “Ua ou musu i le lalolagi”.

Ua ta mai le logo o le lotu o le Kerisimasi ona tu lea o Leilani ma savali i le faitotoa. Ua manaia le loomatua i lona ofu ma lana ula mosooi ma seasea, faaopoopo atu ma le manogi o lona sausau, ua umu lota isu.

Ua toe liliu mai lou tina “Fai sou ofu kakou o Ie loku: ave sau meaalofa mo Iesu”.

Ua maulu i fafo le loomatua ma ataata aamu. “Ha ha, alu age ga ave i le pepe o le Kilisimasi lau meaalofa o le fagupia ma le le loku… Ga ou fausia oe ma lou faamoemoe ia avea ma fiafiaga o lou kiga, a o legei ga o le faakiga”.

E ui lava i lea, ae out e le i talia se upu a le loomatua aua ou te talitonu i le mau a le Tusi Paia, “Ia e ava i lou tama ma lou tina, ina ia faalevalevaina ai ou aso”. 

Ua fai gugu ou lavalava ma ou savali i le falesa ina ua uma ona togi nai au vailima e lua.

Leitioa tau lea po o le po fiafia. Ua pepese ma ususu solo onana ma sisiva. Ua felanuai moli ma laau Kirisimasi a aiga. E leai se tagata e le ulaina se faasolo manogi, a o au, ua alu Tepora ma lou fiafia.

Ua amata le sauniga ma ua tumu saisai le malumalu. O viiga o le fiafia ma laufofoga ataata o le lotomalie. 

Pe toe lima minute i le sefululua, ae tu loa le faifeau ma faapea mai, “Tatou tutulai uma e faafeiloai le pepe o le Kerisimasi. O le po nei, ua fanau ai i le aai o Tavita, le Mesia… Ua igoa foi o ia, o le Silisiliese… O lou Faaola ma lo’u Faaola…

“O le Fetu pupula mai le Itu i Sasae… ua taitaiina le ala o Makoi i le fale o manu… e momoli a latou meaalofa i le pepe o le Kerisimasi.

“Uso e, o le a ea sau meaalofa mo Iesu i lenei tausaga?”

Talofa, ua ou punou ma loimata i le alofa ia Iesu ae leai sau meaalofa ma lou Faaola, ua na o le ata o Tepora i lou lima ma le fagupia i lou mafaufau.

© Samoa Observer 2016

Developed by Samoa Observer in Apia