Manatu o le Fa’atonu - Taunu’uga lelei e afua mai Fa’ai’uga lelei

165 Hits

Tusia - Marj Moore

Fa’aliliu - Maiava

 

O le fa’ama’apeina o le palemene i le vaiaso talu ai e mafai ona fa’aupuina fa’apea “O  se lagona fiafia ae tiga” pei o le tala ia Romeo ma Iulieta a le tusitala ta’uta’ua o Shakespeare. Na mamalu lea sauniga fa’apitoa na tumutumu ai ta’ita’i o le Malo, Ekalesia ma le atunu’u i ona tulaga mamalu masani, ma o se taimi e fa’agalo ai le finauvale, le tusitusi-lima ae maise le tu’u o ma’a ae ma’a ia ‘au i taimi o taualumaga a le Maota. 

O se taimi na ma’alo ai le i’u’ofe o le agalelei, ua mama fo’i le sausau a Tuila’epa Sa’ilele Malielegaoi i lana saunoaga mulimuli a’o le’i alo atu mo Faiga Palota Tele ia Mati 2016. 

E le gata o le fofola o le fala e se’ei fa’atasi ai ma le Itu Agai a’o le fa’amanusina le-soa e fa’afetaia le Fofoga o le Maota, lona Itumalo o Lepa, o le ‘Aufaigaluega a le Malo fa’apea lana vaega uma i le HRPP. Na atagia fo’i i ana saunoaga fa’aTalasua le ogaoga o le sao taua ae maise le fesoasoani tele na maua e le malo mai le tu’u-alalo a le Itu Agai.  

“O le fa’amoemoe atoa lea o se Itu Agai,” o lana fa’aaliga lea, “ia fautua ma maumaututu ai i ona faiva ia.” 

Ui e le’i ta’ua fa’apitoa e Tuila’epa ni fa’ata’ita’iga maumaututu o fautuaga anoa na tu’uina atu e le Itu Agai ma fa’aaogaina e le malo, a o lea pese logomalie na lagi-soso’o i le tali a le Ta’ita’i o le Tautua, Palusalue Fa’apo II.

Na fa’ailo e Palu, o le lima tausaga ua alu atu, e le o se taimi faigofie mo le malo ma fa’apea ai, ae sa mafai lava ona fa’atonutonu le sa i aso ma ogasami faigata”.

Sa ia fa’amanatu fo’i i sui o lana vaega, ua fa’afetaia e le Ali’i Palemia la latou galuega sa fa’atino ma ta’ua ai fo’i, e le’i faigofie i le malo lo latou fa’afeagai ai.

Na fa’amae’a ana saunoaga i lona fa’afetaia o tusitala ma le vaega fa’asalalau mo lo latou sao aoga i le saunia o ‘auala e fa’ailoa ai fa’aletonu ma atualuga ona o le malo ma le ‘aufaigaluega i lana ‘au’aunaga o lo’o fa’atino.  

A’o le’i faia o feofoofoa’iga ia, sa le tu’ua lava e le Ali’i Palemia lana mau masani, i le so’otaga i le va o “fa’ai’uga-fai ma fa’atinoga” lea na ia au’ili’ili toto’a mo e le-malamalama lava.

E to’atele le ‘au-matau-‘upu na manatu, o se taumafaiga lea e toe tau auli-fa’alamolemole  nisi o fa’ai’uga-fai a le malo na matua pi’olua lava ma fa’aletonu ua matua afaina ai ma leaga le taunu’uga lea e le gata ina tatou lagona i nei vaitau a o le fa’apea lava ona fa’aletonu ai le soifua o tupulaga lalovaoa a Samoa i aso o muamua. 

Mafaufau i le fia miliona o seleni na fa’aalu i le maketi i Vaitele fa’apea le maketi i Salelologa lea lava e gaogaoi’i e le o aoga atoatoa; manatu i le uafu ua le toe aoga i Aleipata; ae maise le fa’ataligatuli pea i fa’alapotopotoga tau-tupe a le lalolagi e uiga i ‘aitalafu. Manatu i le tele o tupe so’ona fa’aalu ma fa’ama’umau le-aoga; le fa’aulu-malo pea i le le-va’aia ma pulea lelei o tupe-maua; le mau suiga o le fa’avae o le malo ma isi tulafono e fa’amalie ain a o si to’aititi atoa ai ma le tele o isi vaega e tumu le pepa nei o fa’amalau atu. 

O nei fa’ai’uga uma, o fa’ai’uga lava na faia e le malo. Fa’ai’uga na faia e aunoa ma ni feutaga’iga, ni feso’ota’iga pe soalaupule fo’i ma le atunu’u ae sa fua ma fa’amoemoe i le tala masani “o lo’o matou iloa lelei le mea e sili mo ‘Oe Samoa” ae aunoa ma se manatu mo le una’ia o se ulua’i taumafaiga i le lalolagi mo tagata o lo’o afaina i fa’ama’i le-pipisi, le tino-puta ma le leai o ni galuega.  Ae na lafo sa’o lava e le Palemia le fa’asea lea, le le-mafai ona fa’atinoina o nei fuafuaga, i nai tagata fa’atauva’a, tagata le-tagolima o le atunu’u aoao.    

O lana fa’ai’uga i fa’atinoga ua faia pei o a’oga ua fa’atuina nei i nu’u ma itumalo, a’o lea e naunau pea tagata e fia aga’i mai i le taulaga, e sa’o lele lava. Ae moni lelei, e matua to’etele o tatou tua’oi o lo’o fesoasoani mai e fausia ma toe fa’alelei falea’oga i nu’u i tua. . 

Ma e to’atele fo’i atunu’u o le lalolagi o lo’o autova’a pea i nofoaga tu-taulaga e pei ona ia ta’ua. 

O lana saunoaga fo’i fa’apea e le o lava avanoa faigaluega (i le taulaga) ma le leai o ni fa’ailoga aloa’ia o o tatou tagata mai tua i nu’u e maua ai ni galuega, o se tulaga le-sa’o tele lea i le matau. 

A o le fa’afitauli tele lava, o le le-popole lava lea o le malo e fai se fa’atatau i le leai o ni avanoa faigaluega i totonu o le atunu’u aoao ae maise o ni avanoa e toe-a’oa’oina ai tagata ua matutua.

O lea mea moni, afai o se fa’ai’uga (a le malo) ua mafua ai se fa’aletonu o tagata, e matua faigofie lava ona tuua’ia i latou e leai ni o latou sao i le faiga o fa’ai’uga.;

E le o se  taimi lelei lea e toe tilotilo ai i le fa’ai’uga ma taumafai e sa’ili se fofo ua mafua ai ona le-lelei ma fa’aletonu le taunu’uga ua iai? 

Sa iloilo toto’a ea nei mea? Se mea e ono ‘ausia pe oti ai ma fa’aletonu? Sa faia iai se sa’iliga muamua e fa’amaonia ai e lelei? 

E manatu, o le tele o le fa’aletonu ua iai nei, e fesiligia ai le aoga ma le ‘anoa o fa’ai’uga ua faia e le malo, ua le manino i le tulaga ua o’o nei iai le atunu’u ae maise le le-malamalama i mana’oga ma mo’omo’oga o o tatou tagata. 

(Fa’aliliu e Maiava)

© Samoa Observer 2016

Developed by Samoa Observer in Apia