E pule a tagata i le Fa’atinoga: Palemia

192 Hits

Tuilaepa Sa'ilele Malielegaoi.

Tuilaepa Sa'ilele Malielegaoi.

Ripotia e Lanuola Tusani Tupufia

Fa’aliliu e Maiava 

 

I lana saunoaga mulimuli ae le’i fa’ama’apeina le palemene i le Aso Faraile talu ai, na toe pa’ia ai e le Palemia, Tuila’epa Sa’ilele Malielegaoi, le feso’otaiga o fa’ai’uga-fai ma le taunu’uga ua o’o iai mea o lo’o tutupu nei.

Moni e fai e le malo fa’ai’uga mo le fa’aleleia o le atunu’u ma ona tagata, a o le taunu’uga lava – lelei pe le-lelei, e fa’alagolago lava i tagata.

Na ia ta’ua tulaga tau-a’oa’oga lea ua fa’atuina ai  a’oga maualuluga (kolisi) i totonu o itumalo ma nu’u i tua, o se taumafaiga ina ia nonofo fa’atasi pea fanau ma matua i afio’aga ma alalafaga ma o i a’oga.

Ae ui i le faia o atina’e nei mo lea fa’amoemoe, ae le o taofia ai lava le sa’olotoga o tagata e aga’i mai ai i le taulaga. 

 “Ae le taitai ona lava avanoa faigaluega (i le taulaga) ma o nisi fo’i o latou nei, e leai ni o latou fa’ailoga taualoa fa’aleA’oa’oga e mafai ai ona maua o ni galuega,” o lana saunoaga lea. 

“Ona fa’aaoga lea e matua o a latou fanau e fa’atausolo oloa i magaala; o se tulaga e iloa e matua e fa’atosina ai le to’atele o tagata-fa’atau, a’o lea tatou te silafia lelei, e matua anoano ‘ele’ele e le o fa’ato’aina ma fa’aaoga. 

“O le fa’ai’uga lea e fai e matua ia latou fanau ma e leai se tasi e mafai ona taofia latou nei.” 

Na fa’aopoopo mai le Palemia, e o’o lava fo’i i nisi ua ‘ave iai suafa matai, ua ‘auai fo’i i le pisinisi lea o le fa’atau atu o oloa ma fa’alavelave ai i tagata-tafafao ma le mamalu o le atunu’u.  

 “O le uiga o lea mea; e le mafai ona tatou fa’a’esea le taunu’uga ua o’o iai mai fa’ai’uga ua mae’a ona faia. E o’o lava i atunu’u mauoloa, o lo’o iai lava tagata e leai ni aiga, e momoe solo i luga o ‘auala, i lalo o ‘auala-laupapa ma nofoaga faitele.

“Ae matua mamao lava le ‘ese’esega ma Samoa.” 

Saunoa Tuila’epa, e le pei o Samoa nei, o tagata nei i atunu’u i fafo, e leai ni o latou aiga.

A’o Samoa, e masani tagata uma ma e iloa fo’i e aiga o latou tagata o lo’o feoa’i solo i magaala. 

 “Ua le-ano i o latou tiute-fai fa’aleAiga , i le tausia lelei ma alolofa i tagata nei o lo’o feoa’i solo i magaala.”

Na fa’amamafa fo’i e Tuila’epa e fa’apea, ua fa’aaoga e nisi le tulaga lea – le va’aia pea o tagata o fa’atau oloa solo i so’o se nofoaga – e fa’atusa iai le tamaoaiga o le atunu’u ma lona atina’e.

Na toe fa’amanatu fo’i e le Palemia aso ua mavae, sa na o le fa’alifu fa’i lava ma taro ma se laumoli sa masani ai le atunu’u.

“Na o elegi lava sa maua i faleoloa i na taimi. A’o aso nei, ua matua taugofie le sapasui ma isi taumafa e maua i fale’aiga ma e na o le $30.00 le tau o le pusa-moa i nei aso.

“A fua i tausaga ua mavae, sa na o le fa’anaunau e fia tausasami moa pe a talanoa aiga mai Amerika Samoa i moa-falai ma meainu-suamaliele.” 

O isi fa’ata’ita’ig na lagolago ai lona finagalo, o le tulaga o le alualu i luma o le atina’e o le atunu’u, lea ua va’aia ai le anoanoa o fanau-a’oga  ua ‘auina atu i fafo mo a’oa’oga maualuluga ma manuia ai o latou olaga ae maise fo’i le to’atele o tagata ua lolofi mai e galulue i Samoa nei. 

“Lea fo’i ua tatou va’aia i nei aso le to’atele o tagata faiPisinisi mai fafo, pei o tagata-Saina, o Initia ma tagata mai isi atunu’u ua sa’ili manuia mai i lo tatou atunu’u nei. Ua leai ai lava se ‘ese’esega o tatou nei ma isi atunu’u mauoloa o le lalolagi ae le-mafai ona tatou iloa ia tulaga lelei talu ai o lo’o taula’i la tatou silasila i fafo, ae le o totonu o le atunu’u ma le mea o tupu ai. O nisi pisinisi ua matua paie lava e ao-ao nai sene ma siliva ae fa’amoemoe i se mea e tasi e fa’atau atu ae maua ai le fia miliona o tupe maua.”  

O le ‘ese’esega o Samoa ma isi atunu’u, ona o tagata i fafo e afu i le vevela ma tafe-isu ona o le malulu, o se fa’aaliga lea a le Palemia.

Ae mo aiga o lo’o papa-a’ao i fafo, na ta’ua e Tuila’epa, o lo’o galulue punoua’i, o nisi e ta’ilua galuega i le taimi e tasi a’o lea lea e fa’atalitali ma fa’alagolago tatou e lafo mai tupe mo fa’alavelave fai.

“E o’o fo’i ia latou i fafo, o lo’o taumafai e atina’e o latou aiga ma fai mea-fa’aleLotu i fafo,” o le saunoaga lea a Tuila’epa. 

 “E le o fai atu e ‘aua le lafo maia ni tupe aua o lea e fesoasoani ai i aiga peita’i, ua tatau ona suia o tatou mafaufauga ma le fa’atinoga o le soifuaga nei, ma soia le toe fa’amoemoe i aiga i fafo mo tupe aua e le fua i tupe la’au i la atunu’u.”

Sa ia fa’ailoa fo’i, e tiga lava le taumafai o le malo e fa’alelei a’oga, ae a le faia le tiute o matua e una’i a latou fanau, e le mafai ona manuina.  

“E le mafai ona manuia fanau ma popoto pe a le taumafai ma fa’amaoni i a’oga. E ui fo’i i le taumafai a le malo e una’ia le soifua maloloina lelei o le atunu’u, ae fa’aauau pea ona fafaga e matua fanau mea’ai-suamalie e le maua ai se soifua maloloina, e mautina lava le afaina o isi auga-tupulaga i le tino-puta.

“Ua amatamea ma fa’ama’ite e le malo nisi o fesoasoani ma le fa’amoemoe ua lafo atu i afio’aga ma alalafaga ta’tasi, o ekalesia, o matua ma fanau e fa’atino ma fa’aauau aua le manuia au-i-luma.”

Na fa’amamafa fo’i e Tuila’epa fa’apea, o le fili o nei atina’e uma, o le ola fa’alagolago lea i isi uso-a-tagata.

“E le fa’alelei atili ai taleni ma agava’a ua maua, aua le tautuaina o aiga, nu’u, ekalesia ma le atunu’u.

Na ta’ua fo’i e Tuila’epa le mana’o, ina ia si’itia e le malo fa’amanuiaga mo le ‘Au-matutua.  

Na ta’ua fo’i e Tula’epa le atunu’u o Singapore, lea e fa’apea e leai ni ana faiga tau-fa’amanuiaga fa’apea, talu ai ona o le a ola fa’alagolago uma ai tagata o le atunu’u. 

“O le tiute lea ma le matafaioi a fanau e tausia lelei o latou matua (pe a avea ma tagata matutua) pei ona va’aia ma tausia lelei latou e matua a’o laiti,” o lana fa’aaliga manino lea. 

“O le ituaiga mafaufauga lea, o le a tausia lelei ai e matua a latou fanau, ae lagolagoina ma fesoasoani le malo ia latou fa’apea fanau ma a latou fanau.

“O se ta’ita’i e alofa, e tautala-sa’o ma na te le-fa’aaogaina ni lafoga fa’apea, e afaina ai finagalo o le atunu’u.”

I le fa’ai’uga o lana saunoaga, na fa’afetaia ai e Tuila’epa le Fofoga Fetalai ona o lana galuega lelei i lenei lima tausaga ua mae’a, e fa’atonutunu ai ma fa’ato’afilemu le malo ae maise lava i taimi e si’isi’i ai le tai.

Sa ia fa’afetaia fo’i lona Itumalo o Lepa, o sui o le malo, lana vaega o le HRPP o faipule fa’apea le Itu Agai.

Na ta’ua e Tuila’epa, e le ‘autasi uma finagalo o vaega fa’aupufai i nisi mata’upu, a o le latou lava lea fa’amoemoe maualuga, o le mea e lelei ai le atunu’u.

Na fa’aopoopo mai fo’i i le sao tele o finagalo fa’aalia o le Itu Agai sa fesoasoani tele i le malo ma ana polokalame tau-atina’e fa’asolosolo.

“O le fa’amoemoe atoa lena o se Itu Agai, o le fautua mai ma mautu mo le fa’aleleia o le atuunu’u.” 

Na tali fuaitau le Ta’ita’i o le Itu Agai, o Palusalue Fa’apo II ma momoli fo’i le fa’afetai tele ia Tuila’epa ma lana faiga-malo ona o galuega ua fa’atinoina.

Na ta’ua e Palu, i totonu o le lima tausaga ua mavae nei, e le’i faigofie lea mo le malo peita’i, ua tula’i mai i se tulaga lelei ui ina soua le sami i le folauga sa faia. 

Na fa’amanatu fo’i e Palusalue i lana vaega, le fa’afetaia e le Palemia o a latou galuega sa fa’atino ma e le’i faigofie fo’i ia latou uma.

Sa ia fa’afetaia fo’i tusitala ma le vaega fa’asalalau uma mo lo latou sao i le tapenina o ‘auala ‘ese’ese e fa’ailoa atili ai o latou atugaluga ma popolega. Sa fa’apea fo’i ona fa’afetaia le sao aoga ma le ‘au’aunaga a Ofisa Sili uma ma le ‘aufaigaluega a le Malo i so’o se vaega. 

© Samoa Observer 2016

Developed by Samoa Observer in Apia