Fa’ailoa mai pea suiga ma’ale’ale o le tau

199 Hits

Nisi o va’aiga ogaoga o lo’o ua i ai nei le tele o atumotu laiti.

Nisi o va’aiga ogaoga o lo’o ua i ai nei le tele o atumotu laiti.

Tu’ufa’atasia/Fa’aliliuina: Ilia L Likou

 

O le fa’aauau ai pea o uiga ma’aaleale o le tau o se vaega e pito sili lea ona fai ma popolega  e le gata i le lalolagi ae o le Pasefika e pei ona aofia ai ma Samoa.

E o’o mai i le taimi lenei o lo’o fa’atupula’ia pea ma o se tulaga mata’utia tele a’o toe taumafai ai ina ia toe fa’aleleia i se taimi vave ia vaega uma.

E tusa ai ma ripoti na fa’ailoa mai i le tausaga ua mavae, o lo’o matua manino mai ai lava lea le tele o atunu’u i le itu sauté-sasa’e o le Pasefika, o le a fa’asolo ina matutu ma nisi e fa’asolo malie lava ina matua matutu.

O fesuia’iga nei o le tau (El Nino) e masani ai ona fa’a’umi’umi vaitaimi o afa ma matagi malolosi e a’afia ai se vaega tele o le Pasefika.  

E o’o mai i le taimi lenei o se tulaga faigata o lo’o ua feagai pea ma atumotu laiti ona o le mata’utia ai lea o faiga ma aga fesuisuia’i mai o le tau mai i lea taimi i lea taimi.

I le Pasefika lava ia,  ua logoina ai i latou ina ia nofo uta ai pea ma tapenapena i nei suiga mata’utia e pei ona ua va’aia ma maitauina.

O le tele ai o  ‘a’afiaga ua va’aia nei i gataifale o le atunu’u lenei o Kiribati ona ua fa’asolo ina lolofia atoa lava i le suāsami o se tasi lenei o talitonuga ua leva ona valo’ia e le ‘au su’esu’e o le lalolagi.

O le itu i Sasa’e o le motu o Kiribati e igoa o Tarawa ua amata ona lilofia atoa e le sami, ona o fesuia’iga o lo’o i ai nei le tau i totonu o le lalolagi.

E tusa ai ma sa’iliga e le ali’i Saienisi e suafa i a Simon Donner o le Iunivesite o Peretania i Columbia lea na ia asia Tarawa Kiribati i le 2005 sa ia fautuaina ai le tulaga lenei ona o le si’itia ai o le sami.

 “O aga fesuisuia’ lenei o le tau o se tasi o vaega e ao ona fa’atalitali ai Kiribati ma le manino, aua lava ne’i i ai se masalosalo e le tupu lea tulaga”

O lenei ripoti mai Peretania o lo’o manino mai ai e le gata o Kiribati ae e aofia ai ma Toelau i le si’itia ai lea o le suasami ma lofia ai nei atumotu laiti o le Pasefika.

O le masina o le tausaga lava lenei sa talanoaina ai e  sui o atumotu  laiti le fesoasoani e mafai ai ona tu’uina atu e nisi o atunu’u le fa’atagana latou e ulufale atu ai i nisi o atunu’u mo lo latou saogalemu ona ua va’ai atu lava ua ‘a’ati ‘a’ati lava e le suasami o latou atumotu ma ua tauau atu lava ina fa’aletonu ona o le si’i si’i ai lea o le suasami.

O le taimi lenei e tusa ma le 32 motu nini’i i Kiribati ma e tusa ma le 2 mita ua si’itia ai le sami ma e tusa lea ma le 2.9milimita i le tausaga lea si’itiaga.

Sa fa’ailoa mai e le Peresetene o Kiribati i a Anote Tong o le isi 30 i le 60 tausaga o le a le toe va’aia ai ni tagata i o latou atumotu ona o tulaga nei aemaise ai lava o le le maua ai lea o se vai lelei mo le fofoga taumafa o le atunu’u ona o le sualua lea ua i ai ona o le malosi o le si’itia ai o le suasami.

E le na’o le pau lea o le fa’afitauli o lo’o taumafai ai le atunu’u lenei mo se tali, ona o lea le tulaga na fa’ailoa mai e Bwabwa Oten o ia o lo’o fa’auluulu  ai le Soifua Maloloina o Kiribati le si’itia ai lea o le numera o tamaiti e fa’ananau i aso uma, ma o se vaega ua ave ai nei le fa’amuamua ina ia taofiofia lelei lea tulaga ona o le pagatia o lo’o ua maua nei e le atunu’u lenei o Kiribati.

Ua fa’ailoa i fa’amaumauga a le Malo e o’o atu i le 2030 ua fa’aluaina le faitau aofa’i o le atunu’u i le 100,000 ma ua va’ava’ai nei i ni Polokalame e fesoasoani ai i le to’atele mo le fuafua tatauina o le fanau.

O le tausaga ua mavae na fa’ailoa mai ai le matua’i fautuaina o  Malo ‘Aufa’atasi, Motu o le Pasefika ina ia tapenapena nei mo ni suiga fa’afuase’i le tau (El Nino) e ono a’afia ai le silia i le fa miliona tagata.

 “Ua ‘au’au-fa’atasi le ‘Au-va’ai-tau i le fa’atatau fa’apea, ua tatou aga’i atu i se vaitau mai le malosi i le matua malosi o fesuia’iga o le tau (El Nino) i masina o muamua,” o le fa’aaliga lea a Osnat Lubrani, le Fa’atonu mo le Itulagi a Malo ‘Aufa’atasi.  

“O nisi vaega va’aia o lo’o fa’apea mai ai, o le fesuia’iga lea o le tau (El Nino), e ono malosi e pei o lea sa iai i le 1997/98, e aupito leaga o fa’amauina sa matua afaina ai tele Papua Niu Kini ma Fiti.

“O le taimi lenei ua tatau ai ona sauniuni malo ma atunu’u, mo ni fesuia’iga ogaoga o le tau.   

 “O le tele o atunu’u ua amata nei ona fa’atino fuafuaga mo mugala, ma ua nofo-sauni fo’i Malo ‘Aufa’atasi e tu’uina atu le lagolago e ala i fautuaga fa’apitoa ma le fa’atonutonuina lelei o fuafuaga uma.”

 “O le El Nino lea e mafai lava ona afaina fa’afuase’i ai soifua o le itulagi ma e ono o’o atu i le 4.1 miliona tagata e ono afaina ai ona o le leai o se suavai, le lava taumafa ma tele ai fa’ama’i pepesi i le Pasefika,” o le fa’aaliga lea a Sune Gudnitz, o le Fa’auluuluga o le Ofisa o Malo ‘Aufa’atasi mo le Fa’asoasoaina o Fesoasoani mo Tagata, i le Ofisa o Fa’aitulagi o le Pasefika. 

“O atunu’u e aofia ai Papua Niu Kini, Fiti, Tonga ma le Atu Solomona, ua amata ona iai a’afiaga o El Nino i le taimi nei, ma o le fa’aitiitia o le suavai-timu, ua a’afia ai la’au-toto ma nofoaga e tapu’e ai le suavai taumafa.

“E atili fa’afaigata e taimi mugala nei, tulaga tau le soifua i atunu’u e le’i leva atu ona fa’aleagaina e afa o Pam, Maysak ma Raquel.” 

 “E faigata lava i le taimi nei, pe o le a fa’apefea ona taumafai ia tatala pea a’oga. I le 1997/98 i Fiti, sa fa’alagolago nisi a’oga i ta’avale-vai ma e taua ai le siakia o tane po’o lelei pea i le taimi nei mo le teu-maluina o le suavai. Ua tatau ona fa’agaoioi a’oga i le taimi nei, e fa’amautu e gafatia ona tausisia pea o le mama ma le soifua maloloina lelei, pe a o fa’aletonu vaega mo’omia mo fale le-ta’ua ma isi mana’oga fa’apena,” o le fa’aaliga lea a Dr. Karen Allen, le Sui o le UNICEF i le Pasefika.    

O le mugala fa’a’umi’umi, e aupito faigata mo tina ma fanau o lo’o feagai tele ma le sa’ilia o suavai mai nofoaga i tua i le Pasefika.

“I taimi o mugala, o tina lava tamaiti e feoa’i i nofoaga mamao ina ia maua ni vai mai isi nofoaga e le masani ai, ma e masani lava ona a’afia lo latou saogalemu. O tina fo’i e masani lava ona gafa ma le soifua maloloina o aiga. A le-lava le suavai, o le a fa’ateteleina faigata ona o le a fa’aagaga vai e maua ma fa’amuamua mo vai-inu ma le gaosiga o taumafa,” o le fa’aaliga lea a Aleta Miller, o le sui o Tama’ita’i o Malo ‘Aufa’atasi i le Ofisa i Suva i Fiti.   

O le fa’alelei o paipa-mama ma le fa’ataliga o vai-timu, o vaega taua ia mo faifa’ato’aga mo le fafagaina o manu ma fui ai la’au, ae maise fo’i le aiga i taga-mea, o le gaosiga o mea’ai ma vai-inu. Ua fautuina fo’i nu’u ma afio’aga e uiga ini suiga e tula’i mai i faiga-faiva ma fa’ato’aga ma ua fautuaina ai le totoina o ituaiga-la’au e le afaina i le la ina ia mafai ona fa’alagolago iai i taimi fa’a’umi’umi o mugala. O le faiga o ‘auala talafegai mo faiga-fa’ato’aga, o le fa’aaogaina o otaota ma lapisi e tanu ai le ‘ele’ele, o le fa’asusuina fa’atatau o la’au ma isi mau togafiti e mafai ona maua ai pea taumafa a’o alo i taimi faigata.   

E ono tele ni fa’afitaulu tau Soifua maloloina e ono tutupu i se tausaga o le El Nino, e tatau ai lava ona tausia o le tumama masani ma ia puipuia mai a’afiaga e mafua i le namu.

“O lologa ma mugala e mafai ona tutupu ai le tele o fa’ama’i e aofia ai le diarrohea, o le taifoi, o le mumu, ona o le fa’aaogaina o vai le-mama po’o le fa’aitiitia fo’i o le soifua maloloina ona o le oge-vai. E ono fa’ateteleina fo’i fa’ama’i e mafua mai le namu e aofia ai le fiva o ponaivi, le chikungunya ma le sika ona o fesuia’iga o le tau e fanafanau ma fa’ateleina ai nei vaega fa’alafua. O taumafa le-paleni  po’o mea’ai le-lelei, o le tasi lea o fa’afitauli e ao ona silasila toto’a iai,” o le fautuaga lea a Dr. Liu Yunguo, le Fa’atonu o Galuega Lagolago mo le Pasefika, o le sui fo’i o le Pasefika i Saute i le Fa’alapotopotoga a Malo ‘Aufa’atasi. 

O le a le  El Niño? O le El Nino, o le fa’amafanafanaina lea o le suasami i le vaega i sasa’e o le Pasefika. E mafai ona a’afia ai vaega o le tau i le lalolagi atoa.

O le El Nino e masani ona tupu ta’i tolu i le fitu tausaga, ma e mafai ona tumau ma fa’a’umi’umi mai le ono masina i le lua tausaga. 

 O le El Nino aupito leaga na tupu i le 1997/98. O lona suiga atoatoa, le La Nina, e masani ona tutupu fa’atasi i tulaga fa’ata’amilosaga i le gasologa o le lalolagi. O nei tulaga uma e le mafua ona o fesuia’iga o le tau peita’i, o fesuia’ia o le tau e mafua ai ona matua malolosi ma tele a’afiaga e o’o iai.

© Samoa Observer 2016

Developed by Samoa Observer in Apia